F1-ah Honda-in rorel an tum

Honda chief engineer Shintaro Orihara chuan Honda engine tihchakna tura an hmalak tharte chuan, 2027 tawp lam emaw 2028 tir lamah a rah chhuah hmun an inbeisei a, Honda chuan F1-ah ro an rel leh theih an inbeisei.

F1-a Honda hmalakna hi Red Bull nena nomawi an lak lai nen chuan a hrang daih tawh dawn a, hei vang hian kumin January thla trackside manager leh chief engineer Shintaro Orihara pawhin, bul ṭan ṭhat leh chu a harsa dawn tih a lo sawi tawh.

Zandvoort, Netherlands-ah Japanese company lian hian Additional Development and Upgrade Opportunities (ADUO)-a an upgrade hmasa ber a tlangzarh dawn a, an thil duan thar hi engine kaihhnawih a ni ber.

Orihara chuan, "Kum 2027 atan chuan a hmasa ho ngaihtuahin a danglam hret dawn a, mahse kan ruahmanna hi chu a pangngai reng. Chuvangin kan engine hnathawh tihhmasawnna hi kan la kalpui reng dawn a, kum thara hmasawnna lian zawk thlen hi kan tum ber a ni," a ti.

Honda F1 hian engine-a danglamna an siam khan sawiselna a awm a, mahse an thawhpui Red Bull driver Max Verstappen chuan world championship-ah hnehna a chan avangin an hlawhtlingah a ngaih theih.

Red Bull nen an thawhdunna an tih tawp hnuah Honda hian Aston Martin nen an inremna an nei leh a, 2028 season tawp thleng an thawk dun dawn. Honda hian an thawhpui team-a an driver Fernando Alonso chu champion tir ngei an tum.

Aston Martin hian Alonso bakah a teammate Lance Stroll te an nei mek a, mahse tun season-ah beisei an phâk lo takzet a, vawi khat mah podium an la lawn lo. Hetihlai hian Honda chuan veteran driver Alonso chu tawnhriat a ngah tawh avangin an la ringtawk hle.

Honda-a an hotupa Orihara chuan, "Alonso hian he inelnaah hian kum 20 chhung a lo awm tawh a, 2006 khan Renault chu a lo champion pui tawh a, a kum tam ve deuh tawh mah se a chawlh hma ngeia a champion leh theih kan beisei," a ti.

Kum 45 mi Alonso hian 2005 leh 2006 khan a zawnin a champion a, hemi hnu hian nomawi a chawi leh tawh lo. 2013-a Ferrari-a a awm lai kha a champion leh teuh ber kum a ni a, Red Bull driver Sebastian Vettel a tluk lo.