Jaissle-a lak hmasa ber Dedic

Newcastle United chuan Benfica aṭangin defender Amar Dedic chu pound maktaduai 30 bawr velin an la lut a, an manager thar Matthias Jaissle-a player lak luh hmasa ber a ni.

Kum 24 mi Dedic hian medical test nei zo tawhin St. James Park-a châm turin kum nga daih contract a ziak a, 2023-a Red Bull Salzburg-in league title lan lak ṭum khan Jaissle nen hian an lo inhrawn tawh a, England-ah an inenkawl leh dawn

Austrian defender chuan, "Newcastle United zawm hi ka tan chuan thil thar leh inchhirna tur awm lo tluk a ni. Heta ka awm thei hi ka hlim takzet a, club leh supporter ropui tak takte tana khelh a, bul ṭan ka chak tawh hle. Jaissle nena nen kan thawk dun leh thei dawn a, kan inhriat chian tawh avangin mikhual angah ka inngai dawn lo," a ti

Magpies hian an right back Kieran Trippier chu a contract a tawp hnuah free transfer-in Wolves a zawmsan a, Dedic hian a hmun ruak luah a tum ang. Chutihrualin tino Livramento a awm ve tho avangin a tan rinrawl nih a awlsam dawn bik lo.

Season hmasaah Newcastle hian 12-na ni chungin season an khar a, tun season-ah chet chhiat nawn tum tawh loin enkawltu thar nen a tharin hma an la dawn. Magpies hian August 23, Pathianni zan dar 9:00-ah season thar atana an match hmasa ber ni turin Liverpool an hmachhawn dawn.