United leh Liverpool aia sum hmang hnem Ipswich

Premier League kai thar Ipswich Town chuan Strasbourg aṭangin Julio Enciso leh Abdoul Ouattara te an la lut a, player pahnih an lakna zat chiah hi tarlan ni lo mah se pound maktaduai 47.3 thleng kai chho thei tur niin khawthlang chanchinbute chuan an tarlang.

Tractor Boys (Ipswich sawina) hian tun nipui transfer bazarah an che na hle a, player lak luh nan £150 mtd bawr vel seng tawhin, Liverpool leh Manchester United te aiin sum an hmang hnem tawh zawk.

An lak thar zingah kum 20 mi Ouattara hi season hmasa khan Strasbourg tan match 28 a khel a, midfield luah lumtu niin Conference League semifinal an thlen theihna player pawimawh a ni. A career-ah Strasbourg tan chauh a la khel a, Ipswich hi a club pahnihna tur chiah a ni.

Ivorian midfielder chuan, "La naupang hle mah ila tawnhriat ṭhahnem tak ka nei ve tawh a, ka teammate tharte nen fans hmaa inkhelh ka châk tawh takzet a, ka phur tawh hle a ni," a ti.

Kum 22 mi Enciso erawh Premier League-ah tawnhriat a lo nei tawh a, Brighton & Hove Albion tan a khelh tawh bakah 2024-25 season chawhnu lam khan Ipswich-ah hian loan-in a lo khelh tawh a, English football-ah a mikhual lo.

Kumin World cup khelh zawh takah khan Paraguay tan a fehchhuak bawk a, match nga khelin goal khat leh assist pahnih a nei. Round of 16 hial thlengin France lakah 1-0 in an vanduai

Paraguay international chuan, "Ipswich Town-a ka kir leh thei hi ka lawm takzet. Loan-a ka awm chhung khan nuam ka ti hle a, season liam taa Premier League-a an kir leh pawh khan ka thinlung takin ka lawmpui.

Manager Gary O'Neil nen hian season liam ta khan France-ah kan lo thawk duh tawh a, Ipswich ang club ropui taka kan inhrawn leh thei tur hi ka tan chuan a lawmawm bik," a ti

Enciso leh Ouattara an lak rualin Ipswich hian player 12 an la lut tling chiah a, Championship lama relegate leh mai an tum tawh lo hle. Tractor Boys hian August 22, Inrinni zanah Sunderland mikhualin an Premier League bul an ṭan ang.