Neeraj leh Gopichand ten school hawng

Indian fei khawh thiam Neeraj Chopra leh Badminton player hlui, Pullela Gopichand leh International Academy of Sport Science and Technology, (AISTS) India te ṭangkawp chuan India rama infiamna lam tihhmasawnna leh sports chawisanna tur, Indian School of Coaching Excellence chu New Delhi-ah an hawng.

Indian School of Coaching Excellence (ISCE) hian coach development programme hmanga khawvel huapa coach ṭha chher chhuah a tum dawn a, physical literacy, sports science, sports education, technology leh career development te zir theih a awm dawn.

Glasgow, Scotland-a Commonwealth Games neih zawh taka silver medal latu Chopra chuan, infiammite hlawhtlinna kawngah an coach te chu an pawimawh thu a sawi a, ram chhungah coach ṭha chher chhuahna tur din a ṭul thu a sawi bawk.

Kum 28 mi Neeraj chuan, kal zelna tur hi an coach te kaihhruainaah a innghat thui hle a, infiammi an nihna chauh ni loin mi puitling an nihna kawngah pawh mawhphurhna sang tak an neiin ka hria.

Chuvangin, India rama infiammi ropui chher chhuak zel turin kan coach te hian khawvel huapa zirna, kaihhruaina leh sports science leh infiammite tihhmasawnna atana ṭha leh thar ber ber an neih hi a pawimawh a ni," a ti.

Dronacharya Award leh International Olympic Committee-a coaching excellence citation dawngtu Gopichand pawhin, ISCE chuan khawvel thiamna rawn la lutin Indian coach te a rahbi thar kai tura a puih tur thu a sawi.

Kum 52 mi Gopichand chuan, "India infiamna hmabak chu kan thil din tharah hian a innghat dawn a, ISCE hi khawvel puma kalphung ṭha berte leh India rama kan tawnhriatte belhkhawma coach te tan, kawng engkima hma an sawn theih nana ruahman a ni.

He kan hmalakna hian Indian sport bung thar siamna kawngah awmzia a nei thui dawn hle tih kan ring," a ti. Gopichand hian Olympic medalist Saina Nehwal, PV Sindhu leh mipa world No.1 hlui Kidambi Srikanth te a lo zirtir tawh.