Warriors-ah Jokic a kal thei–Green

The Draymond Green Show podcast thar berah a neitupa Draymond Green chuan Nikola Jokic chungchang sawiin, Golden State Warriors-a zawm chu 'thil thleng thei a ni' tiin a sawi

Kum 31 mi Jokic hian a khelh mekna, Denver Nuggets-ah a contract pawhsei theihna nei mah se inremna thuthlung ziah a duh rih lo a, tun season lo awm tur chauh contract a neih tawhin avangin a thlawna chhuak mai thei a ni tawh.

NBA MVP vawi thum lo ni tawh hi a club thar tur an inrinsiak nghal a, Golden State Warriors hming a ri ring hle. Kum 36 mi Green chuan Serbian center hian Warriors a zawm a nih chuan, Stephen Curry nen team ropui tak an din theih a beisei a ni.

Warriors hian tun hnaiah kum upa lam player an ngah a, Brandin Podziemski, Yaxel Lendeborg leh Moses Moody te chu player naupangah a langsar zual an ni. Green pawh hi season hmasa tawp rual khan a contract a zo a, mahse Warriors-in an la mamawh avangin contract thar an ziahpui.

Kum 2027 FIBA World Cup qualifying tournament-a Serbia-in Bosnia & Herzegovina an hneh hnuah Jokic chuan Nuggets nena contract thar a ziah rih loh chhan sawiin, "Ka rilru takah chuan nipui thleng nghah a, ka career chhung zawng Denver-a hman zui hi ka thil tum a ni," a ti.

Jokic chuan sawi chhunzawmin, "Ka duh ber chu Denver-a khelh zel hi a ni a, nipui lehah contract ka ziak ngei turah ka ngai. Ka tum ber chu ka career tawp thlengin Denver tan khelh a ni. Mahse hotute thu thu a ni a, an thutlukna a pawimawh dawn," a ti ve thung a, Warriors tan hriat a nuam lo ang.

Serbian center hian a vanglai a hmang chho mek a, MVP-ah vawi thum thlan ni tawhin 2023 khan Nuggets chu a champion pui. All Star-ah ṭum riat zet thlan a ni tawh a, NBA chanchinah triple double ngah ber dawttu niin 198 a nei a, Russell Westbrook (209) chiah a tluk lo.