Musiala a ngaihtuahawm loh

Bayern Munich midfielder Jamal Musiala chu nikhaw hre loa a tluk vanga enkawl a nih hnuah, a dinhmun a ṭha a, a ngaihtuahawm loh niin khawthlang chanchinbute chuan an ziak.

Kum 23 mi Musiala hi Inrinni zana Bayern leh RB Leipzig-in friendly match an khelh ṭumin, hun tawp lamah khelmuala a awm laiin a tlu a, rei vak lo buaipui a nih hnuah zawn chhuah ngai loin amahin a chhuak thei a ni.

German midfielder hi tluk chhan hi chiang taka tarlan ni lo mah se, khaw lum lutuk chu a nih theihna lai a awm. Allianz Arena-a team pahnihte inkhelh ṭum khan boruak a lum hle a, 33°C leh 35°C te a ni pha hial.

Leipzig lakah hian Bayern hian 3-1 in hnehna an chang a, Musiala chuan an goal thumna a khung nghe nghe. Musiala bakah Luis Diaz leh player thar Nathaniel Brown te chuan goal khat ve ve an khung bawk.

Musiala hi tun hnaiah a vanduai a, nikum July khan Paris Saint-Germain nen Club World Cup-a an inhmachhawn ṭumin, khatih laia PSG keeper Gianluigi Domnnarumma nen intipalhin a ke ruh a titliak.

Ni 196 zet chawlin Bavarians-in a tel loin season chawhma lam an hmang. Musiala-a'n dam lam a pan chak a, kumin kum tir khan club tan inlan leh thei tawhin World Cup-ah pawh Germany tan a inlan. Mahse season ṭan dawn hnaihah a tluk leh avangin a hma ai nasain a in uluk a ngai tawh ang.

Vincent Kompany hote hian nizan khan Heidenheim nen friendly match an khel leh nghal a, an result kan hre hman lo. August 22, Inrinni zan dar 12-ah Borussia Dortmund nen DFL Supercup an khel zui dawn bawk.