Barcelona-ah Rodri a lut ta

Manchester City thiampuipa, world champion Spain captain ni bawk Rodri chu an ramah a kir ta a, Spanish club lian pahnih Real Madrid leh Barcelona-in ngaihven mah se, Barcelona-ah a lut ta.

Rodri hian Nou Camp-ah kum li khel turin contract a ziak a, Catalan club hian pound maktaduai 65-in an lei chhuak. Rodri hian kum 2019 khan Atletico Madrid chhuahsanin City a zawm.

Manchester khaw club-ah rei tak a châm hnuin a chhuak leh ta a, Spain-ah a kir ta - kum 30 a nih ve tawh avangin a hun tawp lam chu Spain lamah a hmang dawn tihna a ni.

Rodri a hlim

Spanish midfielder Rodri hian season hmasa khan Man City chhuahsan chungchang a lo sawi tawh a, Madrid hming a lam rik avangin tam takin Santiago Bernabeu lama inpu lut turin an ngai hman.

Real pawh hian World Cup best player hi chang ngei turah inngaiin, World Cup zawh rualin an ngaihven nghal a, mahse, Barcelona an lo lan meuh chuan Rodri-a'n a rilru a thlak a, Nou Camp a pan ta.

Rodri chuan, "Ka career-ah thil thar ka hmachhawn dawn a, ka châk takzet. Chona thar, tawn ngai loh thil tawnna hun ṭha, phur taka inkhelh leh theihna tur a ni," a ti a, Barcelona a zawm thei chu a lawm hle.

Nomawi zawng zawng

Kum 30 mi Rodri hian City-ah nomawi chawi theih ang chu a chawi kim - Premier League-ah vawi li a champion pui a, FA Cup (2), League Cup (3), FA Community Shield, Champions League, UEFA Super Cup leh FIFA Club World Cup-ah te a champion pui.

Hei chauh a ni lo - Rodri hian Spain tan Euro leh World Cup-ah nomawi a chawi bawk a, champion theihnaah chuan a champion kim. Mahse, Rodri-a'n a la duhtawk lo a, nomawi chawi belh zel a duh.

Rodri chuan, "Club lian tak, nomawi chawi duha tuihal club ka zawm a, ka rilru puthmang nen pawh a inrem hle a ni. Tun season-a kan hmachhawpte kan hlen ngei theih nan ka theihna zawng zawng ka hlan dawn a ni," a ti.

Mangṭha City

Rodri hian a club hlui Manchester City pawh thlah nghalin, Spanish midfielder chuan, "Hlawhtlinna tam tak kan chante avanga inchhuang tak chungin he club hi ka chhuahsan a, kan hun tawn hlimawm takte avang khan ka lawm hle a ni.

"Manchester ka cham chhunga kan hun tawnte kha hlu ka ti a, ka theihnghilh tawh ngai lo ang. City hian player ka nihna angin min pui mai lo a, ka mihring mihrinnaah pawh hma ka sawn phah nasa hle.

"Manchester Metropolitan University aṭangin ka unaupa pawh a graduate a, ka bialnu pawh NHS (National Health Service) tan a thawk ṭhin. Manchester khaw pumpui hian ka nun min siamsak a ni," a ti a, a club hlui City a thlah.