Sabalenka a chak nuamsa

Cincinnati Open fourth round lut turin world number one Aryna Sabalenka-i'n minute 54 chauh a mamawh a, nimin khan Chinese player Wang Xinyu chu 6-1, 6-3 in a hneh. Belarusian tennis player hian vawiin hian Czech player Sara Bejlek a hmachhawn ang.

Sabalenka hian Wimbledon-ah khan fourth round-ah a tla a, Canadian Open-ah Cameron Norrie hneh loin last 16-ah a tla bawk. Wang Xinyu laka a khelh danah erawh Sabalenka-i'n a theihna sang tak a rawn pho chhuak.

Kum 28 mi Sabalenka chuan, "Darkar khat pawh tling loa chak chu result ṭha tak a ni a, hnehna ka chan avangin ka lawm hle. Ngaihtuah chiam loin rang takin ka vaw let a, chu chuan min pui hle," tiin a sawi.

August 30, Pathianni aṭangin US Open ṭan a ni dawn a, Sabalenka hi a zawna vawi thum champion thei dinhmunah a ding. Serena Williams-i'n kum 2014 khan a zawna a vawi thum nan US Open-ah a champion a, hemi hnua a zawna vawi thum champion thei an awm leh tawh lo.

Tun dinhmunah Sabalenka hi world no. 1 ni mek mah se Australian Open champion Elena Rybakina-i'n a rawn hnaih a, Belarusian nula tan number 1-a dinhmun sawh nghet turin Cincinnati Open leh US Open chet ṭhat a ṭul ang.