Bayern star Jamal Musiala a tlu a nawn

Bayern Munich midfielder Jamal Musiala chu Thawhlehni zana Heidenheim nen friendly match an khelh ṭumin a tlu leh a, August 15, Inrinni khan tlu tawhin ni li chhunga a vawi hnih tlukna a ni. German midfielder hi 'neurological dysfunction' (thluak lam fel lo) vangin enkawl a nih mek thu Bayern chuan an sawi bawk.

Voith Arena, Heidenheim-a inkhelah Bavarians hian 4-2 in hnehna an chang a, Felipe Chávez, Arijon Ibrahimovic, Luis Diaz leh Nathaniel Brown ten goal an khung a, mualneitu tan Yannik Wagner leh Julian Niehues ten goal khat ve ve an khung bawk.

Kum 23 mi Musiala hian minute 61-naah Ismael Saibari a thlak a, minute ruk hnu lawkah a tlu. Medical team te rang takin an tlan lut nghal a, an enkawl hnuah zawn chhuah ngai loin an chhuahpui thei a. German rawlthar Cassiano Kiala-a'n a thlak lehnghal.

Inrinnia RB Leipzig nen an inkhelh ṭuma a tluk hnuah Bayern thuneitute chuan Musiala hi a ngaihtuahawm loh thu an sawi a, a tluk chhan chu khaw lum vang a nih thei thu an sawi bawk.

Leipzig nen an inkhelh ṭum khan Allianz Arena-a team boruak lum zawng chu 33°C leh 35°C te a ni pha hial a, mahse German midfielder hi a tluk leh tak avangin khaw lum vang chauh a ni lo tih a chiang.

Musiala chuan, "Thluak lama buaina ka nei tih hmuh chhuah a ni a, Leipzig leh Heidenheim laka thil thleng ang hi a thlen tir leh thei a ni. A tirah kha chuan ka hlau hle a, mahse ka tan chuan ka nitin nuna thil pakhat ang lek a ni.

Mi thiam tak takte enkawlna ṭha tak ka dawng mek a, a thim zawngin engmah ka thlir lo. Bayern, ka chhungte leh ka ṭhianten bakah fans thlawpna ka dawn reng avangin ka thla a muang hle," tiin instagram-ah a sawi.

Musiala hian club World Cup-ah Gianluigi Donnarumma nen an intihpalh avangin a ke ruh a titliak a, season liam ta khan match tam zawkah inlan thei loin season tawp lamah chauh a rawn kir.

A hliam a dam chauh tihah Musiala hian thluak lam buaina a neih leh takah chuan, season bul a ṭan a beiseiawm loh. Bayern hian August 22, Inrinni zan dar 12:00-ah Borussia Dortmund nen DFL Supercup an khel dawn a, Musiala a khelh a rinawm loh.