Spurs-in Zabarnyi an duh

Indinthar tum Tottenham Hotspur chuan tun nipuiah sum hmang hnem tawh viau mah se, an la duhtawk lo. Paris Saint-Germain defender Illia Zabarnyi chu lakluh an tum leh tawh a, sum an hman belh leh a rinawm.

Spurs hian an defender pawimawh Cristian Romero chu Atletico Madrid-ah an kaltir a, a thlakna turin Ukranian defender hi an duh ber. Liverpool pawhin Zabarnyi hi lo rim tawhin an kiansan leh thung.

Kum 23 mi Illia Zabarnyi hi PSG-ah rinrawl a la ni pha lo a, Marquinhos leh William Pacho te a la nek chhuak zo lo. Mahse a la naupan avangin PSG tlarhnung tinghettu a la nih theih a rinawm.

Zabarnyi hian 2023-25 khan tuna Reds coach Andoni Iraola hnuaia a khelh ṭhat avangin club lianin an lo inchuh tawh a, nikum August khan pound maktaduai 57-in PSG-in an la lut a, season hmasa khan match 28 a khel.

Premier League leh Champions League-ah tawnhriat a neih tawh avangin Roberto de Zerbi-a'n a duh a, Tottenham Hotspur stadium lamah seng luh a duh. Mahse Spurs hian Zabarnyi hi lakluh an tum a nih chuan sum an sen hnem a ngai leh ang.

Tun nipui transfer-ah Spurs hian Sandro Tonali, Mateus Fernandes, Jan Paul van Hecke te lei nan £237 mtd an seng tawh a, Andy Robertson, Marcos Senesi leh Martin Dubravka te a thlawnin an la tawh bawk.