Turkey-ah Spanish Super Cup khel dawn

Royal Spanish Football Federation (RFEF) chuan kum 2027 Spanish Super Cup chu Turkey-ah khelh a ni dawn tih a tichiang ta a, Istanbul khawpuia Ataturk Olympic Stadium-ah inelna hi neih a ni dawn tih an thuchhuahah an tarlang.

Kum 2020 aṭang khan Super Cup hi Saudi Arabia-ah neih a ni ṭhin a, mahse Asia-a football inelna sang ber AFC Asian Cup chu Saudi-in an thleng dawn a, a khelh hun a inan dawn avangin Turkey-ah an sawn.

RFEF chuan khawvel hmun hrang hrang aṭanga dilna, pasarih zet a awm hnuah zirchianna neih leh a nih hnuin Istanbul hi thlan a nih thu an sawi.

Saudi Royal Court adviser Turki Al-Sheikh chuan, "A khelhna a hmun tur sawn avang hian, ram pahnihte inkarah inlaichinna ṭha a awm theih ka beisei a, Turkey leh Saudi Arabia te thawhhona inṭan chhohna turah ka ngai," a ti.

Inelna hi January 7–February 5 2027 chhunga khelh tur a ni a, mahse hetiang hunah chiah hian Asian Cup chu Saudi Arabia-a khawpui pathum–Riyadh, Jeddah, leh Al Khobar-ah te khelh tura ruahman a ni.

Saudi leh Spanish Football Federation te chuan kum 2019 khan, an ramah kum thum chhung tournament hi khel a nih theih nan inremna an lo ziak tawh a, a hnuah hei hi kum 2029 thleng pawh sei leh a ni. Inremna awm mek hi kum nga dang pawh sei leh tura ruahman nia sawi a awm bawk.

An inremnaah chuan RFEF hian kum tinin euro maktaduai 40 an dawng dawn a, 2020 khan King Abdullah Sports City, Jeddah-ah Real Madrid, Atlético Madrid, Barcelona, leh Valencia ten an khel a ni.

Saudi Arabia-ah hian inremna an neih hnuah final vawi ruk khelh a ni a, 2021 khan Covid-19 hri leng avanga zin veivah a theih loh avangin Spain-ah neih a ni a, Turkey hi Spain leh Saudi tih loha Super Cup an khelhna hmasa ber tur a ni ang.

Super Cup-ah hian tun hmain team hnih chiah an inel ṭhin a, final-ah an inhmachhawn nghal ṭhin. Mahse Saudi leh RFEF ten inremna an neih hnuah team pali an tel tawh dawn a, Copa del Rey finalist pahnih leh La Liga champion leh pahnihnain an khel tawh dawn.

Barca chu champion lai an ni a, Catalan club hian kumin kumtir khan 3-2 in an hmelma Real Madrid an hneh. Nakkumah Real leh Barca bakah hian Atletico Madrid leh Real Sociedad te an inel ang.