Dutch GP-ah Hadjar tlan dawn lo

Red Bull driver Isack Hadjar chuan a ban rekah hliam a tawrh avangin Dutch Grand Prix-ah a tlan thei dawn lo a, Red Bull team pakhat zawk Racing Bulls-a an driver Liam Lawson-a'n Pathianni zana an intlansiak hunah Hadjar ai a awh dawn.

Kum 21 mi Hadjar hian chawlh an hman chhungin gym-ah a ban rek a tina a, hei hian Zandvoort-a a tlan leh tlan loh tur a tichiang lo. Hadjar hian inelna a hmachhawn theih inbeisei mah se, nimin khan a inhnukdawk tih nemngheh a ni.

Season hman mekah Hadjar hian point 68 hmu tawhin driver table-ah pariatnaah a awm mek a, a teammate Max Verstappen chu paruknaah awmin point 109 a hmu tawh bawk. Constructors lamah Red Bull hi palinaah awmin, Mercedes, Ferrari leh McLaren te an tluk lo.

French driver Hadjar hi a tlan theih dawn loh avangin Lawson tan hun ṭha a inherchhuak a, New Zealand driver hi kum 2025 kum tir lam khan Red Bull team lian ber anga ngaih Oracle tan intlansiak vawi hnih a hmachhawn hnuah, a chet ṭhat tawk loh avangin Racing Bulls lamah sawn a ni.

Kum 24 mi Lawson hi Oracle tan a tlan dawn avangin, a point hlawhchhuah chu a team awmna dik tak zawk Racing Bulls-in an chang thei dawn lo a, Hadjar aiawh a nih angin Oracle-in a hlawkna an chang dawn.

Lawson hian F1-a a career hi kum thum liam ta khan Dutch GP aṭang thoin a lo ṭan tawh a, hemi ṭum hian AlphaTauri driver Daniel Ricciardo-a'n practice-naah a kut a tihnat avang thoa koh a lo ni tawh.

Racing Bulls aṭanga Lawson a chhuak lawk dawn avangin, a aiawhin Japanese driver Yuki Tsunoda chu a lo tlan ve dawn thung. Kum 26 mi Tsunoda hian vawi 89 zet a lo tlan tawh a, kum liam ta khan Lawson-a aiawhin Red Bull Racing-ah promotion a lo nei tawh nghe nghe.

Tsunoda hian reserve driver anga awm mekin, nikuma Red Bull Racing seat a hloh aṭang khan F1-ah a inlan leh tawh lo. Tun hnaiah Indianapolis 500 winner Felix Rosenqvist-a aiawhin IndyCar lamah a lut ve dawn nia sawi a awm a, Rosenqvist-a hi kum 2027 hian McLaren IndyCar team-ah a kir leh dawn a ni.