Villa chhuahsantu Watkins? Wan Bissaka lut thung

Aston Villa striker Ollie Watkins chu Al Hilal chuan lei tumin tha an thawh mek a, mimal thilah an inrem tawh a, Saudi club hian pound maktaduai 38 bawr velin an ngam niin khawthlang chanchinbute chuan an ziak. Hetihlai hian West Ham United aṭangin Aaron Wan Bissaka chu an la lut dawn thung.

Al Hilal hian Watkins hma hian Harry Kane leh Victor Osimhen te an lo rim tawh a, mahse beiseiawma an awm loh avangin Watkins lam an hawi nghal. Europe-a club ṭhenkhat te nen pawh sawi zawm ni mah se Saudi Pro League club hi an langsar ber.

Kum 30 mi Watkins hian September 2020 khan Brentford aṭangin Villa hi a zawm a, kum ruk a châm chhungin inelna hrang hrangah match 278 a khel hman, goal 108 a khung tawh.

Season hmasa khan match 37 khelin goal 16 leh assist pathum a nei a, Europa League an champion-nan leh Premier League-a palina an nih theih nan a thawh hlawk hle. A chhuak a nih chuan a hmun ruak luahtu an melh vat a rinawm.

Al Hilal-ah hian Yassine Bounou, Kalidou Koulibaly, Theo Hernández, Ruben Neves, Darwin Nunez leh Karim Benzema te an awm a, tun nipuiah khan Dutch winger Crysencio Summerville chuan a zawm bawk.

Hetihlai hian Villa chuan defence tihchakna turin Wan Bissaka an dawr a, Congo right back manah hian £25mtd an seng. Hammers hi an relegate avangin an player ṭhenkhatin an lo chhuahsan tawh a, Manchester United defender hlui pawh a châm dawn lo.

Unai Emery-a hote hian Champions League an khelh dawn avangin squad tihchhah an tum a, Wan Bissaka hma hian Modou Kéba Cissé, Johan Manzambi, João Gomes, Matteo Ruggeri leh Zion Suzuki te lakluh nan £140.5mtd bawr vel an hmang tawh. Hei bakah hian loan-in Alejandro Garnacho an la bawk.