Naupang Chess inelna awm dawn

Mizoram Chess Association leh Lalchhuana Chess Academy (PLCA), Thingsulthliah buatsaih, Chess In School (CIS) hnuaia a vawi khatna atan E4 Italian Opening Chess Tournament 2026 chu Ramhlun Indoor Stadium, Aizawl ah August 22, Inrinni hian neih a ni dawn. He inelna hi kum 15 chin hnuai lam tana buatsaih niin category pali - under 15, 13, 11 leh 9-ah ṭhen a ni.

He inelna hi Mizoram chess-in hma a sawn zelna tur atana buatsaih niin, CIS syllabus anga opening theory pakhat 'Italian Opening' hmanga khelh tur a ni.

Top board ho chu digital board hmanga khelh tur niin, inelna neih chhung zawnga zirlaite game khel lai chu record sak vek an nih dawn a, hei hi an inzir lehna tur atan a ṭangkai dawn vang a ni.

Hei bakah hian khawvela 'online chess platform' lian berte zinga mi Lichess.org-ah live-a pek chhuah a ni dawn bawk. He tournament-ah hian naupang tam thei ang ber tel turin an sawm a ni.

Entry fee hi player pakhatah Rs. 100 a ni a, chief arbiter R. Lalawmpuia (9862888874) hnenah zawhchian duh nei tan zawhchian theih a ni a, hemi number-ah vek hian entry fee chu Gpay hmangin a pek theih.

School pakhat aṭanga player 10 aia tam chhuakte chu entry fee chawi ngai loin, a thlawnin an tel thei dawn a, entry fee hi naktuk tlai dar 5:00 thleng a pek theih dawn.