Dortmund leh Haaland an sang zel

Erling Braut Haaland hming leh 'goal' sawizawm a ni deuh reng a, a zuitu chu chawimawina a ni. Borussia Dortmund striker hi January thla Bundesliga player of the month atan thlan a ni.

Kum 19 mi Haaland hian thlasik bazar lai khan Red Bull Salzburgaṭangin Dortmund hi pound maktaduai 17.1 in a zawm. January thla khan German club tan hian minute 59 chiah khelmual chhungah hun a hmang - mahse, goal nga a khung hman! Minute 11.8 zelah goal khat khung anga chawhrual theih a ni.

Season chanve hmasa lam a hmanna Salzburg tan Champions League group stage lamah Haaland-a'n goal riat a khung hman, Thawhlehni zan hian Paris St-Germain nen last 16 an khel zui dawn a, player ṭha rual zingah pawh en hlawh bik a ni leh ang.

Dortmund manager Lucien Favre chuan,"Dan theih loh," tiin a striker Haaland hi a lo fak tawh a, player ṭha tam tak chu awm mah se ani ang hmabak nei eng leh 

ṭangkai an nei thei chu lawmawm a tih thu a lo sawi tawh bawk a ni.

Norwegian hmatawng hian Zirtawpni zan khan goal khung lehin Eintracht Frankfurt lakah a club hi 4-0 in hnehna a chanpui, rawlthar duhawm Jadon Sancho, Lukasz Piszczek leh Raphael Guerreiro te chuan goal khat ṭheuh an khung bawk.

Inrinni zan khan Bundesliga champion tum RB Leipzig chuan Werder Bremen 3-0 a hnehin point 45 an hmu a, champion lai Bayern Munich (43 points) an lehpel. Bayern hian nizan khan Cologne an hmachhawn a, hnehna an chan chuan a chung berah an chho leh rih ang.

RB Leipzig tan Lukas Klostermann, Patrik Schick leh Nordi Mukiele te chuan goal khat ṭheuh an khung. Inkhel dangah Bayer Leverkusen chuan Union Berlin 3-2 a hnehin a sang pali zingah an inhlangkai a, Hertha Berlin chuan Paderborn 2-1 in an hneh ve bawk.