ISL khel lo tur Diamond Harbour

Indian Football League champion Diamond Harbour chuan season tharah ISL an khel dawn lo - Kolkata club hian ISL khel tura pek ngai, participation fee an pe tla thei lo a, season tharah ISL an khel dawn ta lo a ni.

Tun season ISL-ah hian club-te chuan commercial partner nei lo a, club inrelbawlna hnuaia ISL kal an duh avangin Genius Sports leh FanCode dawrna chu AIFF-in a hnar a, ISL club-te hian AIFF hnenah participation fee vaibelchhe 1.10 ṭheuh pek an intiam thung.

Fee hi vawi hniha pek tlak tur niin, Diamond Harbour hi AIFF aṭanga an prize money dawn tur aṭanga siam remin, first installment nuai 55 chu 'cut' sak an ni a, mahse, second instalment-ah cut tur awm tawh loin, an pe thei ta lo a ni.

ISL fee, second instalment hi August 14 hmaa pe tla vek turin AIFF chuan club-te a hriattir a, Diamond Harbour bik hi August 19, Nilaini, chawhnu dar 2:00 thleng hun pek an ni a, mahse, an pek theih tak loh avangin ISL an khel dawn lo.

Diamond Harbour-ah hian All India Trinamool Congress general secretary Abhishek Banerjee chu a khaipa ber a ni a, mahse, West Bengal inthlanah Trinamool an tlak tak avangin club kalpui zel thei dinhmunah a ding ta lo niin a lang.