Red Bull-ah Verstappen a nghet

Tun season F1-a chanchin ngah tak Max Verstappen chuan a awm mekna team, Red Bull-a châm chhunzawm zel turin thutlukna a siam a, Verstappen hian kum 2030 thleng châm turin contract thar a ziak.

Kum 28 mi Verstappen chuan, "He team-ah hian mi thiam ber berte kan nei a, pakhatna dinhmun hauh leh ngei hi kan thil tum lian ber a ni a, chumi tur chuan rim takin kan thawk ho leh dawn a, ka phur tawh hle," a ti.

Season ṭan hma aṭang tawhin Verstappen hian ngaihven a hlawh tawh a, Red Bull chhuahsan tur ang hiala sawi a ni hman. Mahse contract thar a ziah leh takah chuan amah nena sawi zawm Mercedes leh McLaren te tan beisei a boah a ngaih theih.

Dutch driver chuan sawi chhunzawmin, "A hmaa ka lo sawi tawh angin he team hi ka tan chuan ka chhungkaw pahnihna ang an ni a, inelna kan hmachhawna hnehna min chanpui turin anni aia ṭha an awm bik lo.

Kan thil hawlh chhuah tawh ho kha a ropuiin a nuam hle a, ka zinkawng bul ka ṭanna team leh ka hun tam zawk hmanpuite nena kan thawk chhunzawm zel thei tur aia hlimawm a awm bik lo a, hlawhtlinna tam zawk kan chan theih ka beisei," a ti.

F1-in bung thar a kai a, FIA-in a lo tih ṭhin danin car regulations a thlak thar kum a ni a, tun thlasik khan thil lian tham tak an thlak nual. 2026-a hman ṭan turin car bakah engine leh a ke thlengin an thlak vek. Thil thar an duan Australian Grand Prix, Albert Park Circuit, Melbourne-a neihah khan an hmang ṭan.

Rules thar a chhuah aṭangin sawiseltu zingah Verstappen a langsar a, Dutch driver hian engine tharin mamawh an ngah ta lutuk chu a lo sawisel tawh. Verstappen bakah Lando Norris pawhin Australian GP chu an intlansiak tawha nuam lo a tih ber ṭum niin a lo sawi tawh bawk.

Vawi li lo champion tawh Verstappen hian chetsual a ngah a, racetrack aṭanga chhuah bakah hlauhawm tak taka inelna hmachhawn chhunzawm theih loh te a nei. Car thar chu khalh nuam a tih loh thu leh a hlauhawm thu a lo sawi tawh a, F1 chawlhsan pawh a rilruk hman hial.

Mahse inelna a hmachhawn zel tho a, May thla khan Canadian GP-ah pathumna niin season-a a vawi khat nan podium a lawn. June thla khan Austrian GP-ah pahnihna niin inelna hnuhnung pahnih Belgian leh Hungarian GP-ah khan pathumna leh pahnihna dinhmun luahin, tun season-ah podium vawi li a lawn tawh.

August 23, Pathianni zan hian Dutch GP neih a ni dawn a, Verstappen hian contract thar nen anmahni ram leilungah ngei hnehna chan a duh ang. Hetihlai hian a teammate kum 21 mi Isack Hadjar chu a ban rekah hliam a tawrh avangin MASCOT Circuit Zandvoort-ah a inlan ve thei dawn lo.