Spurs-in City duo an duh

Tottenham Hotspur chuan tun nipui transfer-ah pawisa hmang hnem tawh hle mah se an la duh tawk lo a, Manchester City forward pahnih Savinho leh Omar Marmoush te lak luh tumin hma an la mek.

Spurs hian nikum nipui lai khan Savinho hi lak luh an lo tum tawh a, mahse City chuan Brazilian winger hi hralh an remti lo a, nikum October thla tir lam khan kum 2031 thleng daih turin contract a ziah chhunzawm.

Mahse kum 22 mi Savinho hian hmun a chang tam tawk lo a, season hmasa khan inelna hrang hrangah match 33 khel mah se a tam zawk chu bench aṭanga a luh a ni a, goal thum leh assist pahnih chiah a nei thei.

Kum 27 mi erawh Marmoush match 32 a inlan aṭangin goal ruk a khung a, Erling Haaland-a thachhang dawltu a nih bakah winger angin Pep Guardiola-a'n a hmang ṭhin. Season laklawh laia African Cup of Nations (AFCON) a khelh avangin a inlan hnem tawk lo.

London club-in tu emaw zawk zawk an la thei a nih chuan an tlarhma a chak sawt dawn. Mahse Citizens lamin player te hi tlawm taka chhuahtir an phal dawn lo a, Savinho hi pound maktaduai 85 vel an chhiar bakah Marmoush hi £56 mtd an chhiar nia sawi a awm a, Spurs-in sum an sen hnem leh a rinawm.

Spurs hian tlarhma lama khel thei player te chu hliam vangin an chhawr thei lo a, tun dinhmunah Richarlison leh Mathys Tel te chiah senior player zingah chhawr theih an nei.

Hliam vangin Mohammed Kudus, Dejan Kulusevski, Xavi Simons, Dominic Solanke leh Wilson Odobert te an chân mek a, season hmasaa an chet chhian chhan pakhat an tlarhnung pawp chu hnawh phui tawh mah se, thlen san an duh a nih chuan tlarhma lam an ngaihthah thiang lo.

August 22, Inrinni zan dar 10:00 hian Spurs hian Premier League season thar atana an match hmasa ber ni turin Brentford chu an lenchilh dawn a, nipui transfer-a che na tak club hian chak loa bul ṭan an duh lo ang.