Aaron Gordon-a'n duhtu a ngah

Denver Nuggets chuan draft pick leh regular starter quality nei player nen, an forward Aaron Gordon chu inthleng an phal tih an sawi a, club tam takin Gordon an ngaihven nghal.

Season hmasa khan Champion tura beisei zinga mi ni chungin, Nuggets hi Minnesota Timberwolves lakah an tlawm a, season tharah champion ngei an tum tawh. Hetihlai hian an forward Aaron Gordon chu che chhe lo mah se, hliamin a tlakbuak zin avangin chhuahtir an pawi ti lo.

Kum 30 mi Gordon hi Nuggets-in an chhuah phal thu an sawi veleh, lak luh tumin club ṭhenkhatin hma an la nghal a, American power forward duhtu zingah Los Angeles Lakers, Phoenix Suns leh Boston Celtics te an langsar hle.

Nuggets hian indinthar leh an tum a, an player pawimawh Nikola Jokic tih loh chu tumah chhuahtir hreh an nei lo nia sawi a awm. Hetiang karah hian Gordon-a dinhmun a chiang bik lo.

Gordon hian kum 2020-21 season khan Nuggets hi Orlando Magic aṭangin a zawm a, 2023-a Championship title an lak ṭum khan player pawimawh niin match 68 zet a khel a, a match khelh zawng zawngah hian bul ṭantu a ni vek.

Amaherawhchu title an lak hnuah Gordon hi hliam vangin a buai zeuh zeuh a, season liam ta phei kha chuan match 36 chiah khelin, post season playoff-ah pawh a chawn hliam vangin game 1, 2 leh 4-ah chauh a inlan thei a ni.

Hetiang a nih avang hian Nuggets chuan chhuahtir mai an hreh lo a, Gordon pawh hi a kum a la tam lutuk loh bakah tawnhriat a ngah tawh avangin duhtu a la ngah dawn.