Jones manah Inter leh Liverpool inrem

Liverpool chuan an midfielder Curtis Jones manah Inter Milan nen inremna an nei thei ta a, Reds hian an midfielder tan hian pound maktaduai 30-in an inrem. Inter hian Reds hi £25.7mtd an pe phawt ang a, a khelh ṭhat dan a zirin £4.3mtd an pe leh ang.

Kum 25 mi Jones hian nimin khan medical test nei turin Italy-ah a zin a, he thu i chhiar meuh chuan engkim tihfel a ni tawh hial ang. Inter hian English midfielder hi an hralh leh a nih chuan an hralhna aṭangin Liverpool-in 10% chang ve turin an inrem bawk.

June thla khan Inter chuan Jones hi lei an lo tum tawh a, mahse Serie A champion dilna £21.7mtd chu an lo hnawl. Mahse Jones hian Anfield-ah kum khat chauh contract a neih tawh a, contract thar a ziak lo a nih chuan a thlawn a chhuah theih avangin Reds-in a man phu tawkin an hralh an thlang.

Jones hi Liverpool academy chhuak niin, kum kua a nih lai aṭang tawhin club-ah hian a awm tawh. Kum 2019 khan Jones hian Jurgen Klopp-a hnuaiah Liverpool tan a match hmasa ber a khel a, tun thlengin inelna hrang hrangah vawi 228 a inlan tawh.

Season hmasa khan Arne Slot-a hnuaiah a tla tlum lo a, rinrawl a ni pha meuh lo. Coach thar Andoni Iraola hnuaiah hmun chan tuma beih ai chuan chona thar hmachhawn chhuah a thlang zawk.

Inter hian English defender pahnih Djed Spence leh John Stones te chu an lo la lut tawh a, a hnampui pahnih an lo awm tawh sa avangin Jones hi San Siro-ah a mikhual lo ang.