Sheffield point paihsak mai thei

EFL Championship club Sheffield United chu a leitu COH Sports Bidco Limited (CSBL)-in an leinaa an leiba an pe lo a nih chuan, season tharah point 12 hloh saa an khelh a ngai mai thei niin London High Court chuan thuchhuah a siam.

December 2024 khan Sheffield hi CSBL chuan pound maktaduai 100-a lei turin, a neitu hlui United World group nen inremna an nei a, mahse CSBL hian £35mtd an la pek loh avangin United World-a an hotupa Prince Abdullah bin Mosaad bin Abdulaziz Al Saud chuan CSBL hi titawp turin court-ah a khing.

Nilaini khan High Court-ah hian rorel niin, CSBL-a an hotu Steven Rosen leh Helmy Eltoukhy emaw an aiawhtu pawh an inlan lo. Rorelna pawh hian second 10 chhung bak a awh lo.

Sheffield neitu hlui United World chuan thuchhuah siamin, "He buaina hi ṭha taka chinfel tumin theihtawp kan chhuah a, mahse chhanna engmah kan hmu lo," an ti.

Blades aiawh chuan, "Sheffield United Football Club chuan vawiina High Court thutlukna hi a hria a, he thil hi tuna neitu leh neitu hlui te inkar a ni. Football club hi English Football League nen kan inbe reng bawk. Chuvangin nitina club kal dan leh inkhelh tur a tibuai dawn lo," a ti.

June thla khan club share te company thara sawn chhuah a ni a, football club ni lo, company hran a nih avangin EFL aṭanga dan anga hrem theih a nih loh avangin thil thleng hi chinfel a harsa.

Mahse EFL an awm mai mai bik lo a, CSBL laka hmalak dan tur an ngaihtuah ve mek. Club neitu thar leh an pawlin an club an enkawl dan leh an kalhmang te chu EFL hian an endik ve reng.

English football hmasawnna tur atana hmalatu pawimawh, Independent Football Regulator (IFR) chuan CSBL chungchanga court thutlukna chu chipchiarin an zir chiang ve dawn bawk a, Sheffield bakah leh EFL nen pawh hmalakna a chak zawk theih nan an inbia.