Greenwood-a'n Fenerbahce chakpui zo lo

Nilaini zan khan Champions League playoff-ah Fenerbahce leh Olympique Lyon te inkhelin, Mason Greenwood chuan a team thar Fenerbahce tan goal khung mah se hnehna a chanpui zo lo a, Lyon tan Lois Openda chuan goal a khung ve avangin 1-1 in an inhnehtawk.

Season hmasa khan an Turkish Super Lig-ah Fenerbahce hian Galatasaray tluk loin pahnihna an ni a, UCL khel turin ram dang club ṭhenkhat nen playoff an khelh a ngai a ni.

Round hmasa lamah Turkish club hian Austrian club SK Sturm Graz chu aggregate-ah 3-0 in an lo hneh tawh a, kum 24 mi Greenwood bakah Brazilian forward Talisca te goal hmangin an tlang.

Yellow Canaries (Fenerbahce sawina) hian August 26, Nilaini zan dar 12:30-ah Lyon nen hian second leg an khel leh dawn a, a chak zawk zawkin UCL league round khel tura an tlin tawh dawn avangin inkhel boruak a sang tawh ang

Fenerbahce hian tun nipui transfer-ah tlarhma lam thuam chak an ngai pawimawh a, Greenwood bakah hian Manchester United-a khelhpui ṭhin Romelu Lukaku chu Napoli aṭangin an la lut bawk. Anni bakah hian season hmasa La Liga-a goal 23 khungtu Vedat Muriqi an seng lut bawk a, Kosovo international hian goal 25 khungtu Kylian Mbappe chiah a tluk lo.

Manchester City aṭangin defender Nathan Ake an la lut bawk a, player an neih ṭhat sa bakah transfer-ah an chet nat avangin, an ram league mai bakah UCL an khel phâk a nih chuan zuam chi an ni dawn lo.

UCL playoff-ah Fenerbahce leh Lyon bakah hian team 12–Bodø/Glimt, Celtic, AEK Athens, Viking FK, Celje, Sabah FK, NEC Nijmegen, LASK, Levski Sofia, Dinamo Zagreb, Slovan Bratislava leh Hapoel Be'er Sheva te an la dam.