Spurs-in Savinho an la lut

Tottenham Hotspur chuan Manchester City winger Savinho an la lut dawn a, City nen hian pound maktaduai 85-in an inrem! He thuziak i chhiar meuh chuan Spurs jersey a pawt parh tawh hial ang.

Spurs hian City hi £75mtd an pe phawt ang a, a khelh ṭhat dan a zirin £5mtd an pek belh leh ang. Kum 22 mi hian City-a a cham chhungin, inelna hrang hrangah match 53 a khel a, goal hnih khungin, assist vawi 12 a nei - season hman zawh takah khan league match pasarihah chiah bul a ṭan!

Kum 22 mi forward hian Atletico Mineiro aṭanga a professional zinkawng zawh ṭanin, kum 2022 khan City Football Group hnuaia mi, Troyes a zawm a, mahse, PSV Eindhoven leh Girona-ah te loan-a khelin, Troyes tan hian a inlan miah lo.

July 2024 khan £30.8mtd-in City hi a zawm a, Manchester khaw club tana inlan phak mang lo chungin £85mtd man a la ni tho - kum 2031 thlenga Etihad Stadium-a contract nei player hi City player hralh to ber a ni a, kum 2024-a £82mtd-a Atletico Madrid-in Julian Alvarez an leina man ai pawhin a tam zawk!

Spurs hian Omar Marmoush an la beisei mek bawk a, Manchester City forward hi an la lut leh a nih ngat chuan tun nipui transfer-ah £400mtd chuang an hmang dawn tihna a ni.

Roberto de Zerbi enkawl team hian Sandro Tonali, Mateus Fernandes leh Jan Paul van Hecke te lakluh nan £229.5mtd an lo seng tawh a, free transfer-in Andy Robertson, Marcos Senesi leh Martin Dubravka te an la lut tawh bawk.

Season hmasaa relegate thei dinhmuna ding Spurs hi an dinhmun ngaiah din nawn an tum lo a, champion squad din an tum - zanin dar 10:00-ah tun season-a an league match hmasa ber an khel dawn a, Brentford an lenchilh ang.