Mourinho enkawl Real an inlan dawn ta

Spanish club lian Real Madrid chuan tun season La Liga-a an match hmasa ber an khel dawn a, zanin dar 1:00 hian Espanyol an lenchilh dawn. Real hi an pu hlui Jose Mourinho hnuaia khel tur an nih avangin mipui ngaihven a hlawh ang.

Engtin maw?

Season hmasaah Real Madrid team chhungah buaina a awm a, an manager Xabi Alonso an ban hnuah player te inkarah inrem lohna a tam. Alvaro Arbeloa-a'n enkawlin a tirah chet ṭhat pui mah se rei a daih lo a, nomawi chawi nei loin season an khar.

Los Blancos-in nipui transfer laiin indinthar hna an thawk nghal a, anmahni enkawl turin 'The Special One' inti ngam Mourinho chu Benfica aṭanga la lutin, tun season-ah an hmelma Barcelona title kawl lai chu chhuhsak an tum dawn.

Portuguese coach bakah hian player langsar an seng lut tel bawk a, Yan Diomande, Marc Cucurella, Carlos Espi, Denzel Dumfries, Ibrahima Konate leh Bernardo Silva te an la lut. Heng player te Santiago Bernabeu-a hruai luh nan hian euro maktaduai 225 zet an seng a, season tharah tih mai mai an tum lo.

Hetihrual hian player chhuak an awm ve bawk a, Dani Carvajal leh David Alaba te chu an contract a tawp tawh avangin an chhuak a, midfielder Dani Ceballos-a contract chu tihtawp a ni bawk. Gonzalo Garcia, Cesar Palacios leh Fran Garcia te hralh an ni bawk a, inṭhuahfai hna an thawk.

Tute nge khel dawn?

Real Madrid tan defender pahnih Eder Militao, Raul Asencio, leh Ferland Mendy te chu hliam vangin an inlan thei dawn lo a, mahse Real hian a thlaktu tur an nei ṭha a, Premier League player hlui pahnih Konate leh Cucurella te tan hun ṭha a inhawng thung.

Tlarhma lamah Brazilian winger Rodrygo chu a la inkhel thei dawn lo a, a hnapui Endrick pawh tihrawl na vangin a dinhmun a chiang lo. Brazilian duo bakah Aurelien Tchouameni chu a khelh a rinawm loh bawk a, mahse, test neih leh a nih dawn avangin a khel thei bawk.

Hliam vangin Real hmatawngte inlan kim thei dawn lo mah se an squad a chhah ṭha tawk a, Kylian Mbappe, Vinicius Junior, Jude Bellingham leh Federico Valverde te ringawt pawh thlamuanpui tham an ni. Anni bakah hian Diomande leh Bernardo Silva te an la nei cheu a, RCDE Stadium luhchhuah turin an ṭha tawk.

Vinicius hi!

Tun nipui transfer laiin Arsenal-in Vini Jr lakluh an duh a, Brazilian forward pawhin London club hi zawm a hreh lo nia sawi a tam hle. Mahse a tawpah Vini-a'n Real tana khelh chhunzawm a thlang a, Santiago Bernabeu-ah 2032 thleng châm turin contract a ziak.

Kum 26 mi Vini hian 2019-a Real a zawm hnuah match 375 a khel tawh a, goal 126 a khung tawh bawk. Nomawi chawi theih zawng zawng chawipui vek tawhin, Champions League vawi hnih a lakpuinaah final-ah goal a khung ve ve.

Zanin inkhel turah pawh Vini Jr hi squad-ah a awm a rinawm a, bul a ṭan lo a nih pawhin mipui ngaihven hlawh a ni dawn.