Williams-ah Sainz a cham dawn

Spanish driver Carlos Sainz chuan a team awm mekna Williams-ah contract thar a ziak a, a contract-in a huam chen hi chiang taka tarlan ni lo mah se kum tam tak chhung atan tih a ni a, Williams-ah Sainz kan hmu zel dawn.

Kum 31 mi Sainz hian nikum khan Williams hi Ferrari aṭangin a zawm a, Ferrari-ah hian veteran driver Lewis Hamilton-a'n a thlak. A team tharah hian kum khat chauh la awm mah se nuam a ti a, kum khat hnu lawkah a aia rei châm turin contratc thar a ziak nghal.

A contract hi kumin kum tawp hian a tawp tawh dawn a, mahse Williams tana thu lawmawm ni turin awm zui zel a thlang. Sainz hma hian a teammate Alex Albon pawhin 2027 thleng Williams-a awm turin a contract a lo pawt sei tawh a, hei hi Sainz-a'n inremna thar a ziah chhanah a ngaih theih bawk.

Sainz chuan, "He team hi a chhunga hnathawk hrang hranga, factory leh intlansiakna hmuna thawk zawng zawngte hi ka ring tawk a, an thil lo tih tawhah ka chhuang em em bawk.

Kan vaiin dinhmun ṭha zawka ding turin theihna kan nei a, kan thawhho ṭhat lehzual a pawimawh dawn. Williams hi an ropuina rama hruai kir leh ngei turin theihtawp ka chhuah dawn a ni," a ti.

Ferrari-a a awm laiin Sainz hian Grand Prix hrang hrangah vawi li hnehna a lo chang tawh a, nikuma Williams a zawm hnuah erawh pakhatna a la hauh lo thung. Hnehna la chang chiah lo mah se 2025 khan podium-ah vawi hnih a lawn thung.

Williams champion hnuhnung ber chu 1997 daih tawh kha a ni a, a hnuah an la champion leh lo. Tun hnaiha beisei an pha lo lehzual a, mahse Sainz-a'n a zawm hnuah an invawrh leh deuh a, an team principal James Vowles pawhin hma an sawn thu hi a zep lo a, Spanish driver hi a lo fak tawh.

Season kal mekah Williams hi Constructors table-ah poiunt 11 hmuin pakuana an ni mek a, podium lawn thei an la nei lo. Drivers table-ah Sainz hi 15-naah awm kein a teammate Albon chu 16-naah a awm bawk. Pathianni zana Dutch GP neih turah tun season-a a vawi khat nan hnehna chan ngei an tum ang.