Bayern-in Kane thlun ngheh tum

English striker Harry Kane chuan Premier League lamah kir leh a châk tawh loh thu a sawi a, a khelh mekna Bayern Munich-ah a hlim thu a sawi bawk a, amah duhtu club ṭhenkhat tan hriat a nuam lo ang.

Kum 2023-a Tottenham Hotspur chhuahsantu Kane chuan, "Spurs ka chhuahsan tirh kha chuan England-ah hian engtik niah emaw chuan ka kir leh ang tih rilru ka pu, mahse tunah chuan EPL-a kir leh châkna ka nei hran lo.

Ka kir tawh lo ang chu ka ti hauh lo, mahse, Bayern-ah hian ka hlim takzet. Ka la tawn ngai loh thil ropui tak tak min tawntirtu an ni a, tunah chuan Bavarians tan ka rilru zawng zawng ka pe a ni," a ti.

German champion Bayern chuan an striker chhuanvawr hi thlun ngheh an tum nghal a, English striker hi contract thar ziahpui an tum dawn niin khawthlang chanchinbuten an ziak.

July thla khan Kane hian kum 33 a tling chiah a, hetichung hian Bavarians hotute chuan 2029 thleng cham turin kum hnih daih contract ziahpui an la tum. Mahse amah Kane ber hian kum thum daih ziah a duh nia sawi a awm bawk.

Bayern hian zanin dar 12:00-ah DFL Supercup an khel dawn a, Bundesliga-a an elpui ber Borussia Dortmund nen an inhmachhawn dawn a, Kane pawhin bul a ṭan a rinawm. August ni 28, Zawrtawpni zanah Vincent Kompany hote hian Stuttgart nen, season thara an league match hmasa ber an khel ang.