Liverpool-in Barcola aiah Mbaye an duh?

Liverpool chu Paris Saint-Germain forward Bradley Barcola hel reng mah se, a teammate Ibrahim Mbaye zawk chu an la mai thei niin khawthlang chanchinbuten an ziak. Kum 18 mi Mbaye hi Barcola man an chhiar zat chanvea lei theih an inbeisei.

Mohamed Salah-a'n Anfield a chhuahsan tak avangin Reds-in a thlakna tur an zawng a, kum 23 mi Barcola hian an mit a la ber. Mahse PSG-in an forward hi tlawm taka chhuahtir an phal lo a, a manah pound maktaduai 145 bawr vel an phut.

Reds hian hetiang zata tam sen an inhuam chiah lo a, Barcola lakah an duh angin hma an lak chak theih loh phah. Mahse, tun hnaiah Mbaye an duh zawk a, a man a tlawm zawk dawn bawk avangin lak an hreh lo nia sawi a tam hle.

Sengal international Mbaye hi season hmasa khan PSG tan a inlan ve chauh a, Ligue 1-ah vawi 24 inlanin goal thum khungin Champions League an champion-na kawngah match li a khel ve bawk.

African Cup of Nations (AFCON) leh World Cup khelh zawh takah khan an ram tan a fehchhuak bawk a, ram tan goal lo a khung ve tawh. A kum ngaihtuahin tawnhriat a ngah tawh hle a, Reds hotute mit a tlung hle.

Luis Enrique-a'n transfer bazar-ah tlarhmaa khel thei Mika Godts, Ferran Torres leh Maghned Akliouche te a la lut a, a neih sate an ṭhat bawk avangin Barcola emaw Mbaye awm lo pawh ni se a buai dawn lo.

PSG hian Pathianni zan dar 12:15-ah Rennes an lenchilh dawn a, Barcola leh Mbaye te chu Rennes hmachhawn tur squad-ah an awm ve lo. Player pahnih hi August 17, Pathianni zana RC Lens nen Trophée des Champions-a an inhmachhawn pawh khan squad-ah an awm tawh lo a, an hma hun a chiang lo zel.

Hetihlai hian left back Nuno Mendes chuan an match hnuhnung berah red card a hmuh avangin a inkhel thei dawn lo bawk a, Aston Villa aṭanga an lakluh Lucas Digne chuan Portuguese defender hmun ruak a hnawh khat ang.