Conference League-ah Brighton an nil

Premier League club Brighton & Hove Albion chuan Ningani zan khan Conference League playoffs-ah, Norway club Tromso chu an inhnehtawkpui a, team pahnihten goal an khung theih loh avangi 0-0 in inkhel a tawp.

Arctic Circle hmar lam aṭanga mel 200 vela hlaa inkhelah Seagulls-in inkhel an thunun zawk a, chance pawh an insiam hnem zawk. Mahse Tromso keeper Jakob Haugaard chet ṭhat zan an tawng a, goal khung loin an ṭin.

Kum 2024 hnua a vawi khat nana Europe inelnaa inlan Brighton tan, Norwegian club laka hnehna chan zawh loh hi result lawmawm a ni lo. August 27, Ningani zanah American Express Stadium-ah Tromso hi an lo mikhual ve thung dawn a, an chak lo a nih chuan an tla tawh dawn.

Brighton tan Manchester United leh Liverpool nena sawi zawm, Carlos Baleba leh Yankuba Minteh te chu hliam avangin an chawl a, Norway-a inkhel zingah an tel ve lo.

Tottenham aṭanga club record-a an lakluh Luka Vuškovic erawhin bul a ṭan a, mahse Croatian rawlthar hi a khel ṭha tawk lo hle. Hei bakah hian an lak thar zinga mi Zadok Yohanna chu hun tawp lamah a lut ve bawk.

Fabian Hürzeler-a hote hi Pathianni zan hian Aston Villa nen an inkhel leh nghal dawn a, chawlh a nei dawn lo. Tromso erawh chuan England-a Seagulls an hmachhawn hmain chawlhkar khat chhung chawlh an nei dawn thung.