Barca-in Martinez lam an hawi

Spanish champion Barcelona chuan Inter Milan forward Lautaro Martinez an duh a, Argentine forward tana an inhuamna zat hi chiang taka tarlan ni lo mah se euro maktaduai 100 a pel lo.

Catalan club hian tun hmain kum 28 mi Martinez hi lakluh an lo duh tawh a, mahse kumin kum tir lam khan Atletico Madrid forward Julian Alvarez lakluh tumin an bei. Mahse Manchetser City forward hlui hi Atletico-ah a châm dawn tih a chiang tawh a, Barca-in Martinez bawk an rim.

Barca tan season hmasaa an forward pahnih Robert Lewandowski leh Ferran Torres te an chân a, Lewy hian MLS club Chicago Fire panin Torres hi Paris Saint-Germain lamah an hralh thung.

Season hmasaa goal 15 ve ve khung tling thei an ni a, Camp Nou an chhuahsan takah chuan Barca-in striker pangngai chhawr tur an nei lo a, Martinez an mamawh takzet.

Mahse Inter tan Martinez hi a pawimawh a, captain a nih bakah season hmasa khan Serie A-ah goal 17 khungin top scorer a ni a, hliam vangin khel tam tawk lo mah se ani aia khung hnem an awm lo.

Serie A champion Inter hian Martinez bakah hian Ange-Yoan Bonny, Pio Esposito leh Marcus Thuram te nei tho mah se Martinez hi an innghahna ber a ni a, season tharah pawh an coach Cristian Chivu-a hnuaiah rinrawl a ni leh ang. Hei bakah hian 2029 thleng San Siro-ah contract a la nei a, Barca tan la chhuak turin sum an sen hnem a ngai dawn.

Inter hian zanin dar 10-ah an season thar atana an league match chu an mualah Monza nen an khel dawn a, Martinez-a'n bul a ṭan ngei a rinawm.