4-1 aṭangin Chelsea an 'Comeback'

Frank Lampard-a kaihhruai Chelsea chu Thawhlehni zan khan Stamford Bridge-ah Ajax lakah 4-1 in hnufual hman mah se player naupang rual hi huaisen takin an ding a, beiseinaa an khah tlat avangin 'comeback' ropui an lantir. Goal riat leh red card pahnih awmna inkhelah Blues leh Ajax 4-4 in an inhnehtawk.

Champions League group H inkhel dangah Valencia-in an mikhual Lille 4-1 in an sawp a, knockout stage lut tur hriatthiam a har ta hle. Chelsea, Ajax leh Valencia te hian point sarih vek an hmu a, group match hnuhnung ber thlengin an ngaihnawm dawn.

Champions League group H inkhel pawimawhah Ajax-in Tammy Abraham own goal zarah minute hnihna lekah hma an hruai a, minute hnih hnuah Jorginho hmangin an sut nghal. Dutch champion-in inkhel thunun zuiin Quincy Promes, Blues keeper Kepa Arrizabalaga own goal leh Donny van de Beek te hmangin 4-1 in hma an hruai.

Mualneitu an beidawng duh lo a, Cesar Azpilicueta-a'n siphurh a sut ṭhen hnuah Ajax defender pahnih Daley Blind leh Joel Veltman te chu hnawhchhuah an ni. Penalty aṭangin Jorginho-a'n goal khung nawn lehin Chelsea academy chhuak Reece James-a'n siphurh sutna goal a khung.

4-4 a nih hian minute 15 khelh tur a la awm avangin Chelsea tan chakna chance a ṭha ta zawk. Lampard-a hoten player pakuaa khel Ajax an nawr tawm a, captain Cesar Azpilicueta-a'n minute 78-naah chakna goal a khungah a inngai a, amaherawhchu VAR hmanga ennawn a nih hnuah pawm a ni lo.

Ajax keeper Andre Onano a khel ṭha a, substitute Michy Batshuayi goal khung tur dansakin 4-4 in inkhel a tawp. Goal riat ngawt a lut a, red card leh own goal pahnih ve ve a awm bawk avangin Chelsea leh Ajax inkhel hi inkhel 'chhinchhiah tlak' a ni a, hun tawp lamah Blues chak thei dinhmunah ding mah se inkhel chawhma lamah Ajax an khelh ṭhat avangin point hmuh ve ve hi an phu hle.

Football hmuhnawm a nih ziaah inhnialna tur a awm lo a, sawi uar deuh tan erawh goal riat ngawt a luh miau avangin Stamford Bridge-a inkhel hi âtna tihin a sawi theih. Chelsea manager Frank Lampard chuan, "Inkhel ka en let leh phawt loh chuan thutlukna ka la siam thei lo. Chelsea hian UCL-ah hun bik kan tawng fo tawh a, Liverpool nen 4-4 a kan inhnehtawk te kha ka la hria a, match dang pawh a la tam. Hmuhnawm zawnga kan thlir a nih chuan Ajax nena kan inkhel hi match ropui dangte a el phak var var a ni," tiin a sawi.

Lampard chuan sawi chhunzawmin, "VAR leh red card kha dah ṭha ila. Ka rilru put hmang te, kan khelh dan te kha ka ngaihnat zawng tak a ni a, min ṭantute pawh an lawmin ka hria. Insiamṭhat ngai lai chu a awm tehmeuh mai, mahse kan rilru put hmang ang kha chuan Chelsea hi thui tak a kal thei ang," tiin a naute a fak.

Ajax manager Erik ten Hag chuan, "Joel Veltman khan eng nge a tih theih chuang. A taksa betin a kut a dah a, handball a ni lo, yellow card tur a ni lo. Tunah erawh sawiin awmzia a nei tawh lo a, kan pawm mai a ṭul. Inkhel kan thunun a, thutlukna pakhatin inkhel a thlak danglam hi pawi kan ti hle. Chutihrualin ka naute ka chhuang a, kan inkhel hi a êng zawngin kan thlir thei ang. Stadium leh TV aṭanga inkhel entute mit pawh a tlai ngei dawn," tiin a lungawi zan loh thu a sawi.

02' Tammy Abraham (OG) : Cesar Azpilicueta freekick chawi chu mual vei lam aṭangin Quincy Promes-a'n a pet lut a, Tammy Abraham-a'n khawih fuhin goal-ah a lut.

04' Jorginho (P) : Ajax defender Joel Veltman-a'n box chhungah Christian Pulisic a ti tlu a, Chelsea midfielder Jorginho-a'n a thiam dan takin zuang euhin Ajax keeper Andre Onana a bum.

20'     Quincy Promes : Ding lam aṭangin Hakim Ziyech cross chu Promes-a'n tauh pialin Kepa Arrizabalaga a che hman lo.

35'     Kepa Arrizabalaga (OG) : Hakim Ziyech-a freekick ṭha zet chu Chelsea keeper Kepa-a'n a ban pha lo chiah chiah a, ball hian goal ban perin hemi let hian Kepa hmai fuhin goal-ah a lut.

55'     Van de Beek : Ajax-in counter attack hmangin an vaw let a, Zouma-a'n David Neres tackle fuh tawk loh vanga ball per chu Ziyech-a'n chang fuhin Ajax midfielder hian Van de Beek tan ball ṭha a pe a, Dutch midfielder hian ṭha takin goal-ah a khung.

63'     Cesar Azpilicueta : Chelsea substitute Reece James-a cross chu Abraham-a'n khawih fuhin goal ban bula awm Cesar Azpilicueta-a'n a tlawh lut. Blues-in an captain tih hramna zarah beiseina an nei thar.

68' & 69'  Daley Blind & Joel Veltman : Ajax defender Daley Blind-a'n Pulisic lakah foul-in lang mah se referee Gianluca Rocchi-a'n a kaltlangtir a, Blind hian Abraham ball chang tur a tackle hram. Referee-in kaltlangtir zelin Callum Hudson-Odoi ball petin Veltman-a kut a per. Referee-in Blind leh Veltman te yellow card pahnihna a pe ve ve a, Ajax-in defender pahnih an chan bakah penalty an chawi.

71'      Jorginho : Chelsea tan Jorginho bawk rawn pen chhuakin zuang euhin keeper Onano a vawi hnih nan       

     a bum.

74'     Reece James : Willian-a corner pet chu Zouma-a'n crossbar a tauh per hnuah substitute Reece James-a'n Chelsea tana a goal hmasa ber ni turin chiang zetin a volley lut. Kum 19 leh  ni 332 mi UCL-a Blues tana goal khung naupang ber a ni.

78'     VAR : Chelsea captain Cesar Azpilicueta-a'n chiang zetin a volley goal a, chakna goal ni turah an ngai. Amaherawhchu, VAR hmanga en let a nih hnuah Azpilicueta-a'n ball a chan hma hian Jorginho volley chuan Abraham kut a per avangin goal hi pawm a ni lo.