Australian Open Barty-i'n a vawi khat nan semifinal a lut

Australian Open-ah khawtual nula Ashleigh Barty chuan nimin zing khan Petra Kvitova chu 7-6 (8-6), 6-2  in a hneh. Seeded number 1 tan tun ṭum hi Australian Open-a semifinal a luhna hmasa ber a ni.

Barty hian semifinal-ah Ons Jabeur hnehtu Sofia Kenin a hmachhawn ang. Seeded number 14 Kenin hian 6-4, 6-4 in  hnehna a chang a, major tournament-a semifinal a luhna hmasa ber a ni ve bawk.

Czech Republic nula Kvitova hi Wimbledon-ah vawi hnih a champion tawh a, nikum Australia Open-ah final a lut bawk. Tun ṭum Australian Open-ah match hmasa pathumah set a hloh lo a, last 16-ah seeded number 22 Maria Sakkari lakah set hmasa ber hloh mah se a tho chhuak lehnghal.

Kum 29 mi Kvitova hian Australia mipui ṭan rawn Ashleigh Barty hneh turin theihna a nei a, amaherawhchu a vanduai ṭum a tawng. Czech nula hian break point vawi riat leh set point vawi khat a hman ṭangkai loh bakah tie break-a hma a hruai hnuah a inpawh thlaktir a, ṭum dang a pha lo.

Kum 23 mi Ashleigh Barty hi world number 1 ni mek mah se grand slam bikah chuan nikuma French Open-a nomawi a chawi bak kha champion a la nei lo. Australian Open-ah hian a tel hmasak pathumah first round-ah a tla vek a, nikuma quarterfinal a thlen kha an ram inelna liana a thlen san ber a ni.

Kuminah Barty hian bung thar kaina hun ṭha a nei a, a hmang ṭangkai nghal. Australian nula chuan, "Petra hneh tur chuan a ṭha thei ang bera khelh a ngai a, chona lian tak a ni. Ka theihna enchhinna hun ṭha a ni a, player ṭha lakah ka theihna ka pho chhuak thei hi ka lawm," tiin a sawi.

Kum 1984 khan Wendy Turnbull-i'n semifinal a lut a, hemi hnua Australian nula semifinal thleng leh hmasa ber chu Barty hi a ni a. World number 1 hian Chris O'Neil-i'n kum 1978-a Australian Open a champion hnua champion leh hmasa ber nih a tum ang.

Barty hmachhawn tur Sofia Kenin hian American rawlthar Coco Gauff beiseina a titawp a, Arab nula zinga Grand Slam quarterfinal lut hmasa ber Ons Jabeur hnehin semifinal a lut.

Tunisian nula Jabeur hian bul ṭan ṭha viau mah se unforced error 36 zet a neih avangin Kenin-i'n chak a phu zawk. Kum 21 mi Kenin chuan, "Inkhel harsa tak a ni a, ka insiamrem hnuah erawh ka khel ṭha zawk," tiin a tawp a khar ṭhat zawk thu a sawi.

Tukin zing hian women's singles quarterfinal khelh chhunzawm a ni dawn a, zing dar 5:30-ah seeded number 4 Simona Halep leh Anett Kontaveit te Rod Laver Arena-ah an inkhel dawn. Dar 7:00-ah Garbine Muguruza leh Anastasia Pavlyuchenkova te an inkhel chhunzawm ang.