Police vawi thum an chak zawn

Mizoram Premier League Season 8-ah Mizoram Police-in nimin khan FC Venghnuai 2-0 in an hneh a, point 18 hmuin semifinal an hnaih zel.

Lalbiaksanga Colney hote hian round 7-ah MPL kaithar Venghnuai hi 1-0 in an hneh lo a, parukna dinhmun an luah hman. Phase 2-ah Police hi insiamṭhain Chanmari (2-1), Electric Veng (3-0) leh FC Venghnuai (2-0) an hneh a, match thum a zawna an chak avangin point 18 hmuin pahnihna dinhmun an luah.

Mizoram Police-in Kolasib-a Chhinga Venga an hneh loh ṭumin Malsawmfela ṭhatna a lang leh ṭan a, Lammualah FC Venghnuai hneh loh zui mah se Ramhlun South tlangvalin inrintawkna a nei let. Chanmari 2-1 a an hneh ṭumin Sawmfela'n goal hmahruai khungin man of the match-ah thlan a ni a, Electric Veng 3-0 a an sawp ṭumin goal khung lo mah se man of the match-ah thlan nawn a ni.

Nimin inkhelah Police-in Venghnuai an nawr bet nghal a, woodwork vawi thum an pet per. BS-a Colney hoten goal an mamawh a, mamawh chhana chu Sawmfela a ni. MPL5 best player hian captain Lalfakzuala nen Venghnuai tlarhnung ṭhiatin minute 22-naah ṭha zetin a pet goal a, Police dinhmun a ṭha nghal.

Minute 69-naah Lalbiakhlua'n (Hlutea) Police goal hnihna a khung a, harsatna nei loin Police an chak. Tun season-a a vawi thum nan Malsawmfela chu man of the match-ah thlan a ni.

FC Venghnuaiin match hnuhnung pahnihah Chanmari leh Police an hneh lo a, semifinal kawng a zim phah. Chutihrualin Rindika Hmar hote hian an hnuaia awm Ramhlun North leh Chawnpui FC te an la hmachhawn dawn a, heng club pahnih aṭanga point ruk an hmuh theih phawt chuan MPL an khelh hmasak berah semifinal kawng a la inhawng chhunzawm ang.

Venghnuai coach Rindika Hmar chuan, "Team ṭha zawk leh chak phu zawk an chak," tiin inkhelh banah a sawi a, semifinal beiseina nei turin karleh Zirtawpnia an hmachhawn tur Ramhlun North hneh a pawimawh thu a sawi lang.