Man United tan khua a var thei lo!

Manchester United-in Sir Alex Ferguson-a chhuah hnuah Premier League nomawi beisei ngam ṭum hi an nei tawh lo a, kuminah Michael Carrick hnuaiah beiseina chhete nei mah se kai thar Hull City an hneh loh miau avangin champion beisei ngam a harsa tawh ang.

MKM Stadium, Kingston upon Hull-ah kai thar Hull City-in duthusama ṭhain bul an ṭan a, first half-a Semi Ajayi leh Nobel Mendy te hmangin mualneituin goal an khung. Manchester United-in ball chang tam mah se chhanletna an nei lo a, chak phu zawk Hull an chak.

Tlarhnung pherh

Manchester United tlarhnung vei lam a pawp nghal a, Hull City goal bawh a na. Chutihrualin Bryan Mbeumo-a'n Hull City goalkeeper thar Konstantinos Tzolakis tan hna a siam nghal a, Matheus Cunha pawhin goal zawnah a pet ve bawk.

Hull an talbuai phah lo a, Sheffield United striker hlui Oli McBurnie ball tauh chu Senne Lammens-a'n a dang a, United tlarhnung a phui lo. Minute 17-naah corner kick aṭangin Hull-in goal an khung a, nuihzatthlak rawngkai a ni.

McBurnie-a'n United defender Ayden Heaven venna aṭanga talputin goal-ah a pet a, Lammens-a'n dang ṭha mah se defender Semi Ajayi-a'n a khung. Corner pet tirh hian Noussair Mazraoui-a'n Ajayi a veng a, a goal meuh chuan Ajayi hian vengtu a nei lo a, Mazraoui hi Harry Maguire-a'n a veng tawh zawk.

Tlarhma lamah winger phuahchawp Patrick Dorgu te an hriam tawk lo a, Mbeumo vanneih zan a ni lo bawk. Hull erawhin set piece an hmang ṭangkai a, minute 38-naah Regan Slater freekick pet chu Nobel Mendy-a'n a tauh lut. Luke Shaw-a'n a veng hneh lo. World Cup-a Thomas Tuchel-a koh loh Maguire leh Shaw te United States-a an zin loh vangin vui thei an ni lo.

Goal bawh na tawk lo

Man United hian player thar Andrey Santos leh Youri Tielemans te bul an ṭantir a, beisei anga an chet ṭhat loh avangin second half ṭan chiahah Marcus Rashford lut nghalin Benjamin Šeško leh Kobbie Mainoo te an lut leh bawk.

Mahse maw, United keeper Senne Lammens hmuh tur a la tam hle. Counter attack aṭangin Mbeumo-a'n chance a nei a, goal zawnah pet mah se Hull keeper-in a dang.

Vanneih beiseiin tawnhriat ngah zawk player-te goal khung theih lohna inkhelah kum 19 mi Shea Lacey a rawn lut a, danglamna a thlen thei chuang lo. Michael Carrick hoten kai thar Hull lakah goal an khung thei lo a, goal hnih an chhuah avangin an bul ṭan dan a chhe hle.

Besei tur awm em?

Manchester United-in Hull City an hneh lo nghal a, Newcastle United striker hlui Alan Shearer chuan, "Pre season-a an khel ka en lo a, Hull laka an khel ka hmuh dan chuan an fitness a ṭha tawk lo a, minute 90 nung ṭha taka inkhel turin an inpeih lo," tiin a sawi.

BBC-a an ziaktu Simon Stone chuan, "Pre season-a an match vawi ruk ka en vek a, fitness lam a ni lo. AC Milan an hmachhawn hma zawng khan an fitness lam an sawi lo. Tun ṭuma an starting XI zinga paruk hian July 9 khan training an zawm leh vek tawh," tiin a sawi ve thung.

Carrick-a kaihhruai United hian wing back hmang nasa team lakah harsatna an nei niin a lang a, AC Milan leh Hull lakah an buai ve ve. Chutihrualin captain Bruno Fernandes chuan, "Season liam ta ang tho khan kan chesual. Ball kan chantir nasa mah mah a, inkhelh ṭantir lam minute 20-ah te khan an keeper khan ball a khawih tam hle. Tun aia kan nawr nat a ṭul," tiin a sawi thung.

Man United boss Carrick chuan, "Game khat chauh a ni a, pawi kan ti. Chutihrualin vawi khat chak loh a ni mai a, a nihna anga kan hmachhawn mai a ṭul a ni. Ṭha zawkin kan rawn kir leh ang," tiin a sawi. August 30, Pathianni zan dar 9:00 hian Manchester United-in Ipswich Town an mikhual ang.