Champion zia chhuahtu Arsenal

Arsenal ṭantu tan kawng bumboh a awm rih lo a, hlimna tur hlir a ni. Mikel Arteta hote hian inkhel thunun chungin kai thar Coventry City chu 3-0 in an sawp. Gunners tan Kai Havertz, Bukayo Saka leh Martin Odegaard ten goal khat ṭheuh an khung a, keeper David Raya-a'n goal chhuah loin bul a ṭan bawk.

Gunners hian Community Shield-ah Manchester City an sawp tawh a, Arteta-a'n player pahnih a thlak. Malpui hliam vangin Bruno Guimaraes a inlan thei lo a, Noni Madueke erawh bench-ah dahin Declan Rice leh Bukayo Saka te an lut.

Nipui bazarah Arsenal-in tlarhnung an thuam chak a, chutihrualin Frank Lampard hote lakah an goal bawh a na hle. Player thar Christos Tzolis a nung ṭha viau a, goal khungtu erawh season liam taa rinrawl te tho an ni.

Gunners-in chance an nei mawlh mawlh a, minute 15-na lekah Kai Havertz-a'n tun season league-a an goal hmasa ber a khung. Tzolis-a hnathawh a pawimawh a, Riccardo Calafiori pass a ṭha a, German forward Havertz a 'cool' hle.

Tlarhnung aṭanga tlarhma lama Arsenal tleh phei chu Coventry tlarhnung tan dan zawh rual a ni lo. Rice-a'n chak takin a la chhuak a, Odegaard nena an inthlawp hnuah English midfielder hian Tzolis tan a pe. Greek winger cross chu keeper Carl Rushworth-a'n a beng per na tawk lo a, minute 23-naah goal ruakah Saka-a'n a khung.

Arsenal-in inkhel a thunun a, Coventry-in tlarhnungah player dah tam mah se Arteta naute an ṭhiat mawi thei hle. Captain Odegaard-a'n first half tawp hma chiahin khung thei lo mah se second ṭanah a khung nghal. Norwegian midfielder hian minute 49-naah Ben White-a ball pek chu pet fuh tawk lo mah se goalline a pel hram tho - goal ropui nen a hlut dan a inang reng.

Coventry hian goal zawnah vawi khat chauh an pet a, Arsenal erawh vawi 19 goal shot an neihah goal zawnah vawi ruk an pet. Gunners-in an phu ang ngeiin 3-0 in an chak a, an tumpui la nem deuh mah se an khelh dan thlirin champion turin theihna an nei a, rinhlelh tur a awm lo.

Arsenal boss Mikel Arteta chuan, "Lawmna tur a tam a, kan thawhrimna hmuh tur a awm a, khatianga khelh chhoh reng kan tum dawn. Chumi tur chuan theihna pawh kan nei a, hmasawn zel kan tum," tiin an khelh danah a lungawi a, defender thar Ezri Konsa an neih avanga a lawm thu a sawi bawk. Pound maktaduai 55-a Arsenal zawmtu Konsa hi squad-ah a la awm lo.