Fulham khelmualah coach thar Alonso hoin Chelsea

Manchester United an tlawm a, Tottenham Hotspur pawh an tlawm. Arsenal an chak a, nizana inkhel Liverpool leh Manchester City result kan hre hman lo thung - 'Premier League zet chu' kan ti leh reng dawn niin a lang.

Coach thar Xabi Alonso hoa inlan tur Chelsea chu zanin dar 12:30-ah an inlan ve dawn chauh a, khualmualah Fulham an lenchilh dawn - Alonso hnuaiah eng ang tak nge an nih kan hre chho dawn.

Blues hian season inbuatsaihna friendly match vawi ruk khelin, vawi thum chiah an chak a, vawi khat draw neiin, vawi hnih a tlawm zawk an ni. Mahse, friendly match-ah academy player an khelh ve nual ṭhin avangin league match nena sawi zawm chi a ni lo.

Chelsea beiseina

Blues-in tun nipui transfer-ah player 10 ngawt an la lut a, mahse, Kairat aṭanga an lei Dastan Satpayev chu loan-a an chhuahtir lehnghal avangin player pakua lei ang an ni.

London club hian season hmasaah beisei an phak lo a, coach pahnih an nei hman. Tawnhriat nei tam lo player rual an kawl avangin, hmahruai zet hnua tawlhthluk an nei fo a, ṭul loa card chawi a tam hle bawk.

Coach thar Alonso-a'n heng thil duhawm lo hian Blues result-ah nghawng a nei ṭhin tih a hria a, tawnhriat nei ṭha, kum 36 mi midfielder Jordan Henderson leh kum 35 mi striker Danny Welbeck a la lut tel.

Eng tak ang maw?

Alonso hnuaia Blues khelh dan enin, 3-4-2-1 formation hmangin an rawn inrem tura ngaih a ni a, chuti a nih chuan tlarhmaah striker Joao Pedro a pawimawh dawn.

Chelsea striker hi Brazil-in World Cup-ah an ko lo a, Blues tan malsawmna a chang thung. Pedro hian squad a zawm hma thei a, pre-season-ah ringawt pawh goal sarih a khung tling der tawh.

Blues hian Aston Villa aṭangin Morgan Rogers chu pound maktaduai 117-in an la lut a, season hmasaa Aston Villa tana a khelh dan anga a khel chhuak thei a nih chuan a man pawh hi 'a phu' tiin kan sawi thei ang.

Blues an ṭha

Chelsea-in Rogers an nei thar a ni mai lo a, Cole Palmer an kawl sa bawk. English midfielder hian season hmasaah hliam a nei bawk nen, beisei a phak lo a, tun season-ah 'Palmer' tak tak pholan a duh dawn.

Manchester City-in Enzo Fernandez la beisei reng mah se, Chelsea-in an deadline tuk a pelh tawh avangin Enzo chelh theih an inbeisei - tunlai boruak nen zaninah bul a ṭan loh pawhin a mak lo ang.

Alonso hi Real Madrid-in beiseina sang tak nena an lak, an ban tak a ni a, "Real-a ka hliamte chu Chelsea hmangin tuam dam mek a ni," a ti a, a dam lehzual nan zanina chak an mamawh.

Duh loh hnu!

Zanina Chelsea leh Fulham inhmachhawn tur hian thawnthu inang tak an nei - Alonso leh Fulham boss Alvaro Arbeloa te hi Liverpool leh Real tana khel dun ṭhin an ni a, Spain national team-ah pawh an khel dun ṭhin.

Hei mai a ni lo - Arbeloa hi Alonso ban a niha thlaktu a ni a, season hmasaa Real Madrid coach pahnih an intawng dawn tihna a ni! Arbeloa hian Real-a a player hlui, Spanish player beiseiawm Gonzalo Garcia leh César Palacios te chu Fulham-ah hian a chhawm.

Fulham hi pre-season match vawi ruk a kaihhruaiah vawi hnih chiah hnehna a chanpui a, EPL-ah chuan hei aia result ṭha zawk an beisei dawn. Blues lakah chak chunga bul a ṭan thei a nih chuan, a chungah rinna an nghat sawt ang.