Brentford-in Spurs an sawp!
Season hmasaa relegate hlauhthawnawma ding Tottenham Hotspur-in thawnthu hlui thlen nawntir an duh tawh lo a, nipui transfer-ah player thar lakluh nan pound maktaduai 400 dawn an seng.
Mahse, Spurs-in sum ngah vang ringawtin a hlawhtlin theih loh tih a takin an tem a, Brentford-in 3-0 in an lo sawp! Roberto de Zerbi leh a naute an mualpho a, inzirna tur an la ngah hle.
Brentfrod tan Keane Lewis-Potter, Vitaly Janelt leh Michael Kayode ten goal khat heuh an khung a, Spurs-in a chhanletna tur an nei lo - Brentford tan Igor Thiago chuan penalty a la chhuih lut lo mah mah!
Hmel thar & beiseina
Spurs-in sum an seng hnem a, Brentford lakah pawh hmel thar an awm nual. Tlarhnungah player thar Andy Robertson, Marcos Senesi leh Jan Paul van Hecke ten inkhel bul an an vek a, hei chu 'Spurs thar' an ni, tih loh rual a ni lo.
London club tan midfield-ah pound maktaduai 100 man Sandro Tonali pawhin inkhel bul a an a, mahse, Newcastle United midfielder hi a club thar tana a match hmasa berah a langsar lo hle!
Minute 12-na lekah Brentford hian goal an khung nghal a, Mamadou Sangare-a siamsak chu vengtu nei loa ding Keane Lewis-Potter chuan goal-ah a chantir a, rin loh zawkin hma an hruai.
A la tawk lo
Spurs hi Hull laka Manchester United tlawm thu hre saa inlan an ni a, 'si khat chauh alawm' tia thlamuanga awm chi a ni lo tih a lang. Minute 33-naah Mathias Jensen-a shot chu Antonin Kinsky-a'n dansak mah se, a per lehlam chu Janelt-a'n goal-ah a chantir.
Brentford-in 2-0 a hmahruai chungin chawlhlawk an hmang a, Spurs-in an rum haih ve eih lo thung! Second half-ah De Zerbi-a'n danglamna thlen tumin £85mtd man Mateus Fernandes leh Rodrigo Bentancur te luhtirin, Conor Gallagher leh Lucas Bergvall a la chhuak.
Mahse, Spurs-in danglamna an thlen lo! Second half an aanga minute lina lekah Kayode a inlar a, khel ha em em mai Sangare shot chu dan ni mah se, Kayode ke bulah a tla a, goal-ah a chantir chiang hle.
Spurs mualphona
Brentford-in goal thum an khung a, sum hmang hnem Spurs an zawr a ni ber mai. Mahse, London club hian duhtawk an la tum chuang lo - inkhel thlak danglam tura luhtir Bentancur chu Kevin Schade lakah a foul a, referee Michael Oliver-a'n penalty spor a kawk.
Bees tan Igor Thiago a lo pen chhuak a, mahse, Brazil striker vanneih zan a ni lo - post a pet per a, Spurs an thaw huai. Brentfrod tan talbuaina tham erawh a tling lo a, 3-0 in an chak ta tho.
Spurs tan erawh inenfiahna tur a tam a, London club hian August 26, Nilaini zanah League Cup second round an khel zui dawn a, Charlton Athletic an hmachhawn dawn - league match khelh leh hmain insiamremna hun an nei.
Siamhatna
De Zerbi-a'n sum tam tak seng chungin result ha a hlawh chhuak lo a, a team a siamrem vat a ngai dawn. Italian coach chuan, "Kan khel chhe thlawt a, ball inchuhah kan hlawhtling lo zel bawk si. Kan beih tur angin kan bei tawk lo," a ti.
Italian coach chuan sawi zawmin, "Player henkhat chu World Cup zawha squad rawn zawm ve chauh an ni a, player thar kan nei nual bawk a, kan la inpeih lo a ni. Mahse, khatianga khel tur kan ni lo a, inzirchian kan mamawh," a ti a, a lawm lo hle.
Mahse, De Zerbi hi EPL-a Brighton & Hove Albion lo enkawl tawh a ni a, a zam mai lo ang. Spurs boss chuan, "Kan result leh kan khelh dan khan min hawng hle," a ti a, hmasawnna tur tam tak an la neih thu a sawi zui.