Chak turin Real-in vanneihna mamawh

Spanish club lian Real Madrid chuan Jose Mourinho-a'n a enkawl leh hnua league match an khelh hmasa berah, Inrinni zan khan Espanyol chu 2-1 in an hneh a, chak tur erawhin vanneihna an mamawh thung

Jude Bellingham chuan hmahruaina goal khungin Espanyol tan Álex Calatrava-a'n an siphurh a sut a, hun tawp dawn Real tan nipui laia Levante aṭanga an lak luh Carlos goal hmangin an chak hram.

Tute nge khel?

Los Blancos tan an defender thar Denzel Dumfries leh Ibrahima Konate ten bul an ṭan nghal a, Dean Huijsen leh Alex Carreras te nen tlarhnungah an ding. Player tharte hi Mourinho hnuaiah hmun pawimawh an chan chhunzawm a rinawm.

Bernardo Silva pawhin bul ṭanin Federico Valverde nen inkawpin, Jude Bellingham leh Arda Guler te inkarah a lai lum an chang. Tlarhmaah Kylian Mbappe leh Vinicius Junior an inkawp bawk.

A goal hma

Inkhel ṭan aṭanga minute kuana lekah Arda Guler-a freekick pet chu Bellingham-a'n a tauh lut nghal a, a team hma a hruaipui nghal. Goal an khung hnuah Real-in inkhel an thunun a, Mbappe leh Dumfries tena an neih ve nghal bawk avangin nuamsa taka an chak mai a rinawm hman.

Mahse Espanyol an bet bik lo a, goal an chhuah hnuah insiamṭhain Real keeper Thibaut Courtois an rum ṭhaih zeuh zeuh. Minute 30-naah goal an khung ta nge nge, vei lam sir aṭanga Javi Hernandez-a cross chu vengtu nei lo Cala-a'n chiang zetin a pet goal a, Courtois tan dan ngaihna a awm tawh lo.

Goal an chhuah danah Espanyol player te ti ṭha viau mah se, Real player te defence a khawng tawk lo. Box chhungah ven loha Cala an awmtir chu an tuar

First half-ah Mbappe leh Dumfries te bawkin an chance neih an hlah a, Espanyol pawhin chance duhawm bik neiin Roberto Fernández chuan hnai tak aṭangin a tauh fuh tawk lo a, tauh lut ngat se result a danglam hial ang.

Vanneihna

Second half-ah Real-in dan pangngaiin inkhel an thunun a, mahse goal hmaah an hriam tawk lo. Vinicius Jr leh Mbappe ten an thiamna leh an tlan chakna hmangin nawr mah se, Espanyol tlarhnung te an din khawng tlat avangin a hmawr an bawk fuh theih lo.

Goal khungtu Bellingham-a'n corner aṭangin kawh zetin tauh leh mah se, Espanyol keeper Marko Dmitrovic-a'n a dang hman a, English midfielder hian goal dang a khung thei bik lo. Valverde-a chuan goal ban a pet per bawk a, goal-ah an vanduai hle.

Hun tawp a hnai zel a, Real-in thapui chhuahin an nawr a, an huaisen rah an hmu. Minute 90-naah French forward Mbappe chuan box chhungah chak taka ball khalh lutin, Espanyol defender ten a ball khlah lai an lo tihpersak a, Espi-a'n changin keeper a paltlang hnuah an chakna goal a khung.

Hun pek belh minute li awm mah se Espanyol-in chance an insiam thei tawh lo a, an inhnehtawk dawna a lan hnuah kum 21 mi Espi goal hmangin Mourinho naute an chak.

Engtin zel?

Inkhelh banah Portuguese coach chuan, "Espanyol kha an khel ṭha a, mahse chak kan phu zawk in ka hria. Second half-ah khan kan khel ṭha a, goal khung tur khan risk pawh kan la. A tawpah kan huaisen leh kan thawhrim rah kan hmuah ka ngai," a ti.

Real squad a chhah ṭha a, an player thar Marc Cucurella leh Yan Diomande te chu bench aṭangin an la lut thei a, an player tharte an inlan kim vek. Hei bakah hian bench lamah tawnhriat ngah Antonio Rudiger leh Brahim Diaz te an la kawl cheu a, champion turin beiseina sang tak an nei dawn.