Bayern-in champion-in bul an ṭan

German champion Bayern Munich chuan Inrinni zan khan DFL Supercup-ah, Borussia Dortmund chu 2-1 a hnehin an champion a, Vincent Kompany hoten champion chunga season bul an ṭan dawn avangin an inringtawk sawt ang.

Signal Iduna Park-a inkhelah Bayern an chungnung tluan a, minute 28-naah an player thar Nathaniel Brown chuan mawi zetin an hmahuaina goal a khung. Kum 23 mi German left back hi a vanneih zan ni se goal dang khung thei tur a ni.

Kumin nipui laia Frankfurt aṭanga an lak luh Brown hian, an match hnuhnung bera Heidenheim nen an inhmachhawn ṭumin goal a khung tawh bawk a, Bayern-ah a tlangnel nghal hle.

First half injury time-ah Michael Olise chuan an goal hnihna a khung a, French forward hi Dortmund defender ten tibuai mah se ball a hloh phah lo a, tawih takin a pet goal.

Second half-ah Bayern an inthlahdah avangin goal dang an khung thei tawh lo. Dortmund erawh insiamṭhain minute 75-naah Fabio Silva chuan hnai tak aṭangin an siphurh a sut ṭhen a, Dortmund an phur thar.

Mahse Niko Kovac-a naute hian chance an insiam thei lo a, minute 89-naa an defender Ramy Bensebaini-a'n red card a hmuh hnuah thawh leh ngaihna a awm tawh lo a, hun a tawp zui nghal bawk avangin a tlawm zawkah an ṭang.

DFL Supercup hi Bundesliga champion lai leh DFB Pokal champion-in season hawn nan an khel ṭhin a, mahse Bavarian hian season hmasa khan inelna pahnihah hian nomawi an chawi ve ve avangin league-a pahnihna Dortmund chuan an hmachhawn a ngai.

Belgian coach Kompany naute hian August 28, Zirtawpni zanah Stuttgart an mikhual dawn a, season thar atana Bundesliga match hmasa ber tur a ni dawn. Bavarians hian hliam vangin Serge Gnabry, Bryan Zaragoza leh Tim Binder te chu an la chhawr thei dawn lo a, tun hnaia thluak lam fel lo vanga tlu Jamal Musiala a inlan thei dawn lo bawk.