Villa-in Goretzka an hnaih

Aston Villa chuan Leon Goretzka chu free transfer-a la lut turin mimal thilah inremna an nei tawh niin Fabrizio Romano-a'n a sawi a, he thu i chhiar meuh chuan engkim tihfel a ni tawh hial ang.

Kum 31 mi Goretzka hi season hmasa tawp rual khan Bayern Munich-a a contarct a zo ve nghal a, a duhna lam apiangah a kal thei. Hei hi hriain Villa chuan an rim nghal a, Unai Emery-a'n Villa Park a lak luh a duh.

Villa tan hian tun nipui transfer laiin midfielder pahnih Johan Manzambi leh Joao Gomes te an la lut tawh a, mahse Youri Tielemans-a'n Manchester United a zawm a, Amadou Onana chu World Cup laia a khup a tihnat avangin a lo kir leh hun tur a sawi theih loh bawk.

Hei bakah hian season thara Champions League khel tur an ni a, squad tihchhah an tum bawk avangin Goretzka hi an player mamawh tak niah a ngaih theih a, UCL nomawi lo chawi tawh a nih avangin a tawnhriat hi a ṭangkai thei ang.

Goretzka hian Bayern-a kum riat a awm chhungin match 312 a khel hman a, goal 51 a khung bawk. Germany tan vawi 73 inlan tawhin kumin World Cup-ah pawh khan match thum a khel.

Premier League club hian tun nipuiah player an chân nasa a, Tielemans bakah Morgan Rogers, Ezri Konsa leh Lucas Digne te chu club lian zawmin an chhuak tawh a, Ollie Watkis chu Al Hilal nen sawi zawm a ni mek bawk.

Zirtawpni khan Emery chuan, "A chungchangah hian buaina kan nei tih chu a chiang reng. Kan player a ni a, hralh kan duh lo. Mahse ani leh club tana thil ṭha a nih chuan a aiawh tur player dang kan la leh mai tur a ni. Chu chu tun hma aṭanga kan lo tih ṭhin dan pawh a ni," tiin Watkins chungchang a sawi.

Nizan khan Villa hian tun season Premier League-a an match hmasa ber khel Brighton nen an khel a, an result kan hre hman lo.