Champion lai Inter an chak nghal

Serie A champion lai Inter Milan chuan Inrinni zan khan, season thar atana an match hmasa berah Monza chu 4-1 in an hneh nghal a, Cristian Chivu naute hian kai thar club laka hnehna chang turin harsatna an tawk lo.

Inter tan Hakan Calhanoglu-a'n minute rukna lekah kawh zetin an hmahruaina goal a khung a, Gustavo Varela chuan Mozna tan minute 29-naah a sut a, 1-1 in chawlhlawk an hmang.

Second half-ah erawh Piotr Zielinski, Pio Esposito leh Yann Aurel Bisseck te chuan goal khat ṭheuh an khung a, Monza tan Varela goal khung chu Italian champion chhaih kawlhna chauh a ni.

Nipui laia an Inter player lak thar zingah bul ṭan an awm lo a, Aleksandar Stankovic leh John Stones te chuan te chu second half-ah luhtir an ni a, Ivan Provedel chu bench-ah a ṭhu tluan bawk.

English player pahnih Djed Spence leh Curtis Jones te erawh squad-ah hmuh tur an awm lo a, an match dawt lehah Jones hi a khelh theih a rinawm tawh a, Spence erawh hliam tenau a neih avangin a dinhmun a chiang lo thung.

Barcelona nena sawizawm Lautaro Martinez chuan bul a ṭan bawk a, goal khung lo mah se a khel chhe lo. Argentine forward hi Catalan club-in lak duh mah se a rilru a la peng lo tih khelmualah a lantir.