Miami Heat-ah Thompson a kal

Dallas Mavericks player Klay Thompson chuan Miami Heat a zawm a, American shooting guard hian Mavericks nen a contract titawp tura an inrem hnuah a thlawnin Heat hi a zawm.

Kum 36 mi Thompson hian kum 13 zet Golden State Warriors tan a khelh hnuah 2024 khan Mavs hi a zawm a, Warriors a chhuahsan hnuah beisei a pha lo hle. Mavs-a kum hnih a awm chhungin match tinah point 12.9 nei ang a ni a three point line aṭangin 39% a score bawk.

Season hman zawh takah khan Thompson hian Mavericks tan match tinah point 11.7 leh rebound 2.1 nei ang a ni a, club-ah a tlaktlum loh avangin a chhuah dawn tih thawm a tam a, Los Angeles Lakers a zawm dawn anga sawi a awm bawk.

Mahse a tawpah chuan Heat a zawm a, a career-a a vawi khatna atan Eastern Conference-ah a inlan dawn. Heat hian Giannis Antetokounmpo an lo la lut tawh a, MVP vawi hnih lo ni tawh bakah hian Bobby Portis leh Tim Hardaway Jr. te an lo seng lut tawh bawk.

Thompson hian Warriors a chhuahsan hnuah khel ṭha tawk loin, sawisel kai nasa mah se tawnhriat a ngahna hi Heat-in an chhawr ṭangkai dawn. Warriors tan vawi li a champion-in Stephen Curry nen 'Splash Brothers' tih hiala koh an ni ṭhin a, All Star-ah vawi nga lai thlan a ni tawh bawk.

Hei bakah hian NBA chanchina three points luh hnem lamah palina a ni a, Curry, James Harden leh Ray Allen te chiah a tluk lo a, a khelh dan enin Allen hi a khum theih a rinawm.

Mavericks president Masai Ujiri chuan, "Klay hi NBA khel tawh zinga ṭha ber zinga mi a ni a, Mavericks tana a thil tih tak zawng zawng avang hian kan lawm tak zet a ni. A career-a a thil puitlin tawh zawng zawngte hi kan zah em em a, a kal zelna turah duhsakna kan hlan a ni," tiin Thompson an thlah.