Match 25 atan John Collins an hrem

Atlanta Hawks forward John Collins chu damdawi hman phal loh a hmang tih hmuh chhuah a ni a, basketball inelna sang leh ngaihhlut ber NBA-ah match 25 chhung a inlan thei dawn lo.

Kum 22 mi Collins hian damdawi hman phal loh zinga mi Peptide-2 a hmang tih hriatchhuah a ni. Collins hian hrem a nihna hi khinlet a tum, nizan thleng kha chuan a khin letna thu hriat tur a la awm lo thung. Collins chuan, "Ka thil eitur leh in tur ka fimkhur thei em em a, hetiang thil ka chunga a thleng hi mimal leh team ang tan pawh a pawi bakah a zahthlak, duh reng vanga tihsual a ni lo," a ti.

Thla hmasa mai khan Phoenix Suns centre Deandre Ayton pawh damdawi hman phal loh hman ruk vangin match 25 atan hrem a ni tawh a, August thla khan Brooklyn Nets forward Wilson Chandler pawhin hremna hi a lo tawk tawh bawk.