Mizo fighter-te an chak

Mizoram State Mixed Martial Arts Association (MISMA) professional fighter chherchhuah zinga mi, Chawnpui/Khawzawl tlanga Lalnunsanga Chhakchhuak chuan, Legacy Fighting Championship 2-ah hnehna a chang a, Hyderabad-a fight hmuhnawm takah, Delhi fighter ṭha Dushyant Singh chu second round-ah knockout hmangin a hneh.

SPES Martial Arts academy-a training mek Sangsanga hian mawi tak maia a khupa a knockout avangin, 'KO of the night award' a dawng hial. Hetihlai hian, he fight night-a inlan ve tho Lalramhlimpuii erawh a chak zo ta lo thung.

Hetihlai hian India rama MMA leh K-1 professional fight night lian berte zinga mi, Aturto 4.2-ah Lalngaihawma'n hnehna a chang bawk a, TMX gym-a training mek Duhawma hian unanimous decision-in Diyo Rimo a hneh - main event a ni.

Itanagar-a neih event-ah hian International MMA & K-1 R&J leh MISMA general secretary ni bawk Samuel Lalrozama chu event commissioner a ni a, main event, co main event leh India vs Nepal international Pro MMA bout-ah te a referee a, a kaihhruaina hnuaiah hian National R&J pahnih, MISMA treasurer Lalṭhakima leh MISMA ECM Lalchhuanmawia te chuan Referee leh Judge hna an thawk ve bawk.