Champion lai Chanmari FC hmaah Kanan FC

MPL-a champion lai Chanmari FC-in I Day Football semifinal-a Aizawl FC an hneh loh avangin inelna ṭan hma hauhin hliam an tuar. Vawiin tlai dar 3:00 hian Chanmari FC-in Kanan FC an hmachhawn dawn a, Star Cement MPL13 match hmasa ber a ni ang.

Kanan hian I Day Football-ah final an thleng thei a, inkhelah Aizawl FC hneh lo deuh mah se goal an hum rei thei hle. C. Zothantluanga (Apuia) kaihhruai KFC hian Chanmari FC lakah pawh point thum hmuh kher an tum dawn lo a, point khatah pawh an lungawi dawn avangin Chanmarians tan fimkhur a ṭul dawn.

Rochhingpuia kaihhruai Chanmari hian season liam ta khan league round-ah goal 32 an khung a, tun season-ah hei aia tam khung thei turin squad pawh an nei chhah ṭha. Kanan lakah pawh hnehna chang nei an tum dawn a, inkhelh ṭantirh aṭangin attacking game an lantir nghal ang.

Chanmari FC hian season liam ta khan Kanan FC hi an intum hmasak zawkah 2-0 in an hneh a, ṭum hnihnaah 5-1 in an sawp. An inkhelh tawhna thlirin Chanmari chak tura rinkai an ni a, mah se Kanan hian MPL-a tawnhriat an neih tawh avangin awlsam taka hneh theih an ni tawh kher lo ang.