Atalanta lakah Roma an tlawm

Inrinni zan Italian Serie A inkhelah Atalanta chuan Champions League hmun ruak an inchuhpui AS Roma chu 2-1 a hnehin palina dinhmun an luah a, an elpui Roma aiin khelh zat inangah point rukin an sang zawk.

Mikhual Roma lamin striker Edin Dzeko hmangin chawlhlawk hma chiahin goal hmahruai an khung chu second half-ah Jose Luis Palomino hmangin an sut a. Minute 59-naah bench aṭangin Mario Pasalic dahluh a ni a, Atalanta midfielder hian khelmual a luhaṭanga second 19 lekah chakna goal a khung.

Atalanta coach Gian Piero Gasperini chuan, "Tawnhriat kan neih belh zel, player zawng zawngin an theihna an hlan avangin ka lawm. Champions League khel turin kan dinhmun kan siamrem tawh, chutih rualin Roma hian beidawng loin min um reng dawn tih hriat a ṭha," a ti.

Roma hi match an neih hnuhnung pali zinga pathumah an tlawm a, a sang pali zinga tel phak a harsa tawh dawn. Serie A match khelh hmabak match 14 ngawt a la awm avangin thil a la danglam thei hle thung.