Arsenal captain aṭangin Xhaka an hnawl

Granit Xhaka chu Arsenal captain a nihna hlihsak a ni a, manager Unai Emery chuan a striker Pierre-Emerick Aubameyang chu captain nghet a nih nghal tur thu a sawi.

Kum 27 mi Xhaka hi Gunners fans lamin an lawm vak lo, khelmual chhungah leh social media lamah beih a tawk nasa thei hle. October 27-a Crystal Palace nen an inkhelh ṭumin thlak a ni a, khelmual a chuahsan tur chu auhel niin Switzerland international hian fans chu tham lo takin a chhanglet.

Premier League match hnuhnunga Wolves nen an inkhelh ṭumin Xhaka hi squad-ah telh a ni lo a, nizana Europa League khel tur team zingah pawh a tel lo. Xhaka rawn let hunah pawh Auba-a'n captain armband a hreng tawh ang.

Gunners manager Emery chuan, "Granit Xhaka nen ngunthluk takin kan inbia a, captain zingah a tel tawh loh thu ka hrilh a, ka thutlukna pawh a pawm. A thil tih a dik lo tih a inhria, fans lakah pawh ngaihdam a dil ngei tur a ni," a ti. Auba a inlan loh ṭumah pawh Hector Bellerin, Alexander Lacazette leh Mesut Ozil te chu captain armband hreng thei tur an ni.

Swiss midfielder hian 2016 khan Borussia Monchengladbach aṭangin Arsenal hi pound maktaduai 35-in a zawm a, 2017 FA Cup final-ah inlanin Chelsea hnehin nomawi an chawi. Season hmasa khan a club hi League Cup leh Europa League final thlenpui mah se an hlawhtling lo.

Arsenal hi Premier League-ah pangana an ni mek a, Inrinni zan hian an chunga awm pathumna Leicester City an lenchilh ang.