Goal nga nen Barca-in bul an ṭan

Season a tharah thil tam tak inthlak awm mah se, Barcelona an danglam ve lo. Pathianni zan khan an mikhualna ramah Elche chu 5-0 a sawpin champion lai an nih chhan an tilang.

Catalan club tan Raphinha leh Fermin Lopez ten goal hnih ve ve an khung a, Borussia Dortmund aṭanga an lakluh Karim Adeyemii chuan a club thar atana goal hmasa ber a khung bawk a, Hansi Flick-a naute nuamsa takin an chak.

An inthlau

Inkhel ṭan aṭangin Barca an nung nghal a, Lamine Yamal-a'n keeper chauh a hmachhawn hnua a pet over chu a ui vawng vawng ang. Minute 14-naah Raphinha-a'n a penalty hlawhchhuah chu goal-ah chantirin a team hma a hruaipui a, Barca an hawikir tawh lo.

First half hun pek belhah Adeyemi-a'n goal hmahruai khungtu Raphinha pass chu mawi takin a khung a, Barca-in goal hniha hmahruai chungin chawlhlawk an hmang.

Hei le Gordon

Second half minute 65-naah Newcastle United aṭanga Barca pantu Anthony Gordon-a'n Yamal a thlak a, mual chhung a luh aṭanga minute hnihna lekah Raphinha goal khung tur a siamsak nghal.

Minute li hnu lawkah Gordon kan hmu leh nghal a, English forward hian chak taka ball a tlan luhpuiin keeper chauh a hmachhawn hnuah duhsak takin Fermin tan a pe a, Spanish midfielder hian an goal ruakah a khung.

Kum 23 mi Fermin-a'n a la duhtawk mai lo a, minute 79-naah a ball hmuh chu ṭha taka a inher kualpui hnuah tawih takin a pet goal a, hun tawp thlenga goal dang a luh tawh loh avangin nuamsa takin Barca an chak.

Mahse!

Season bul ṭan nan goal nga khung mah se Barca tan chanchin lawmawm lo a awm a, kum 22 mi Gavi chu Adeyemi goal khung hma hretin a inhliam vangin thlak a ngai.

Spanish midfielder hian a khup dinglam a tina a, khelh chhunzawm tum mah se a theih loh avangin mittui nen khelmual a chhuahsan a, a hnampui Pedri-a'n a thlak.

Barca manager Flick chuan, "A khupah hliam a tuar a, mahse a inhliam tirha kan ngaih ang aiin a hlauhthawnawm loh. MRI test te kan nei ang a, chiang takin a hliam chungchang kan hre thuai ang," a ti.

Engtin zel?

Catalan club tan Gavi inhliam hi thil pawi tak ni mah se an player tharte an che ṭha nghal a, Flick-a tan inhnemna tur a awm. Adeyemi-a'n goal a khung nghal bakah Gordon-a'n assist vawi hnih a nei a, La Liga-ah an tlangnel nghal.

Nipui transfer-a an lak luh zinga mi Jesse Bisiwu chu senior team-ah a la awm lo a, Manchester City aṭanga an seng luh Rodri hmel hmuh tur a la awm lo bawk. World Cup khelh zawh taka Golden Ball dawngtu an neih avangin, Gavi awm lo mah se buaina tur an nei lo.

Chhuak tur anga sawi Alejandro Balde a inlan lo bawk a, squad-ah pawh a awm lo. Flick-a chuan, "Team-ah rilru a pek tawh loh avangin haw turin ka hrilh a, chhuak turin ka ti lo thung. Nidangah kan inbe leh dawn," a ti

Hetihlai hian Spanish champion hian striker pangngai an nei lo a, Robert Lewandowski leh Ferran Torres te an chhuah hnuah a thlakna tur an la seng lut thei lo. Elche laka striker hna chelhtu Raphinha khel ṭha viau mah se, club lian an tum hunah no. 9 position-a khel thei an la mamawh dawn.