Leipzig-ah Nkunku a kir dawn

AC Milan forward Christopher Nkunku chuan a club hlui RB Leipzig tan a khel leh dawn a, tun season chhung loan-in German club-ah a khel dawn niin Fabrizio Romano-a'n a tarlang. Season tawpah Leipzig hian a ngheta lak an duh chuan euro maktaduai 30-in an lei thei dawn bawk.

Kum 28 mi Nkunku hian Paris Saint-Germain aṭangin a career a ṭan a, senior team tan a khelh phâk meuh loh avangin 2019 khan Leipzig a zawm. Leipzig-ah kum li a awm chhungin inelna hrang hrangah vawi 172 inlanin goal 70 a khung a, assist 56 a nei bawk.

German club-a a awm chhung hi a career-ah a khelh ṭhat ber ṭum tia chhal ngam a ni a, 2021-22 season khan 'Bundesliga Player of the Season'-ah thlan a ni nghe nghe.

French forward thiamna hi Chelsea-in an hai lo a, 2023 khan £52 mtd-in an lei chhuak. Blues tan hliam a neih avangin a inkhel thei lawk lo a, a dam hnuah pawh beisei a phâk loh avangin nikum khan Milan a pan.

Season khat lek a khelh chhungin Milan tan vawi 35 a inlan a, goal riat a khung sak hman. PSG forward hlui hi Premier League club pawhin ngaihven mah se a club hlui Leipzig tana khelh a thlang ta zawk.

Leipzig hian August 29, Inrinni zan dar 7:00-ah Borussia Monchengladbach nen, season thara Bundesliga match hmasa ber an khel dawn a, Nkunku a inlan nghal a rinawm.