Mercedes driver chunga leng Norris

Thla khat dawn Formula 1-a chawlh hman a nih hnuah, Pathianni zan khan Dutch Grand Prix hmangin inelna chhunzawm leh a ni a, champion lai Lando Norris chuan hnehna changin tun season-a che ṭha tak Mercedes driver pahnih Andrea Kimi Antonelli leh George Russell ten an tluk lo.

McLaren driver Norris-a'n ṭha takin bul a ṭan a, hma a hruai nghal. Lap lina-ah Antonelli-a'n a lehpel a, Italian driver hian hun tam zawk chu hma a hruai. Norris hi Ferrari driver Lewis Hamilton-a'n a hnu lawkah a tlan pelh avangin podium a lawn phâk a rinawm loh hial.

Mahse kum 26 mi Norris-a beidawng lo a, lap 54-naah driver pahnih hi a lehpel leh a, a hawi kir tawh lo. Driver dangin an lehpelh theih tawh loh avangin a zawnin hnehna a chang. Norris hian inelna neih hnuhnung ber Hungarian GP-ah khan pakhatna a lo ni tawh.

British driver chuan, "Kuminah che ṭha reng lo mah ila, car ṭha tak kan neih tawh avangin ka hlauthawng lo. Speed sangah team dang aiin kan ṭha a, mahse kan hmabak championship title awlsam takin kan la ang tih erawh ka sawi ngam lo thung," a ti.

Tun season-ah Norris hian podium vawi li a lawn tawh a, vawi hnih hnehna a chang tawh. Drivers table-ah palina a ni a, Constructors table-ah a team chu pathumna a nihpui bawk. Season hmang chhe lo mah se champion nawn leh tur chuan chetsual a thiang tawh lo.

Norris hnungah Mercedes driver pahnih Antonelli leh Russell te thlengin pahnihna leh pathumna an ni a, Ferrari driver pahnih Hamilton leh Charles Leclerc te chuan palina leh pangana dinhmun an hauh bawk.

McLaren driver pakhat zawk Oscar Piastri chu che chhe lo mah se paruknaah a thleng a, a hnuai dawt chiahah Red Bull driver Isack Hadjar inhliam vanga a aia tlan Liam Lawson a thleng bawk.

Hetihlai hian Red Bull-a contract thar ziak zo hlim Max Verstappen chu lap hnihna lekah a chesual a, bang a sut palh avangin a tlan chhunzawm thei lo. Dutch driver hian an mahni ramah ngei hnehna chan a tum chu a thleng ta lo a, a tan inelna chhinchhiah tlak a ni lo.

Kum 28 mi Verstappen chuan, "Kumin Dutch GP-ah ka vanduai takzet a, ka team tan beisei ka phâk loh avangin a pawi ka ti hle," a ti. Dutch driver hian season kal mekah podium vawi li lawn tawh mah se pakhatna a la ni lo a, table-ah parukna a ni mek bawk.

Verstappen bakah hian Haas driver Oliver Bearman chu lap 22-naah a chetsual avangin a tlan chhunzawm thei lo a, driver paruk zet an chetsual avangin a tawp an thleng zo lo.

Williams tana contract thar ziak zo hlim Carlos Sainz Jr. chuan beiseina sang tak nei mah se, a chet ṭhat tawk loh avangin 16-na a ni a, a tawpa thlenga tlan zingah a thleng hnuhnung ber.