Cavaliers tan Harden khel zel dawn

Cleveland Cavaliers-a a contract a tawp hnuah James Harden chu free agent ni hman mah se, club hruaitute nen inbiain kum thum dang khelh chhunzawm turin an inrem a, a contract thar hi a hmang zo a nih chuan 2029 thleng Cavaliers-ah a khel dawn.

Kum 36 mi Harden hian kum thum a awm chhungin dollar maktaduai 97 a hlawh dawn a, tun dinhmunah NBA a khelh tirh aṭanga a hlawh tling khawm hi $414 mtd bawr vel a ni a, NBA chanchinah $500 mtd hlawh phâk pathumna tur chiah niin LeBron James leh Kevin Durant te huangah a awm dawn.

Harden bakah hian Golden State Warriors player Stephen Curry, Philadelphia 76ers center Joel Embiid leh Boston Celtics forward Paul George te pawhin $500 mtd an hnaih ve tawh bawk.

American shooting guard Harden hian naktukah kum 37 a tling dawn a, NBA-ah season 18-na tur niin a contract zawh thlenga a inkhel a nih chuan season 20 a khel tling dawn.

Houston Rockets tan pawha khel tawh Harden hi, a kum tam ve deuh tawh mah se Cavs tan rinrawl a la ni thei a, season hmasa khan Eastern Conference-ah palina niin Conference Finals-ah New York Knicks chu 4-0 in an ngam lo. Knicks hi an champion zui bawk.

Season hmasa khan Harden hian match tinah point 23.6 leh assist pariat nei ang a ni a, match 70 zet a la khel thei. Chutihrualin Harden hi tun hma angin a che rang tawh lo tih hai rual a ni lo a, defence lamah a thawh hlawk lo hle.

Kum 2016 hnua a vawi khatna atana champion an tum a nih chuan Harden-ah chauh an innghah a thiang dawn lo a, Donovan Mitchell, Evan Mobley leh Jarrett Allen te chu an coach Kenny Atkinson-a'n a hman thiam a pawimawh bawk ang.